Ilo juon jikin iturearin aelõñin Israel, armej ro ie rar tõmak bwe iju ko remaroñ tõl er. Juon boñ, jet em̦m̦aan jãn Rear rar reilõñl̦o̦k im loe juon iju emmeramram ilañ ej em̦m̦akũt im rar l̦oorel̦o̦k. “Iju” in ear tõl er ñan Jerusalem. Em̦m̦aan rein rar jino kajjitõk ippãn armej ro im ba: ‘Ewi ajri eo enaaj kiiñ ñan RiJu ro? Kõmar itok bwe kõmin badikdik ñane.’

Ke Herod, kiiñ eo an Jerusalem, ear roñ bwe enaaj wõr juon kiiñ kããl, ear lukkuun inepata. Ear kajjitõk ippãn bũrij ro rel̦l̦ap im ba: ‘Ia eo kiiñ in en kar l̦otak ie?’ Rar uwaak im ba: ‘Rũkanaan ro rar ba bwe enaaj kar l̦otak ilo Betleem.’ Kõn men in, Herod ear kũrtok em̦m̦aan ro jãn Rear ñan ippãn im ba ñan er: ‘Kom̦win etal ñan Betleem im pukote ajri in. Innem kom̦win kab ro̦o̦ltok im kaalikkar ia eo epãd ie bwe ikõn̦aan etal im bar badikdik ñane.’ Ak ilo m̦ool, Herod ej riabe er.

“Iju” eo ear bar jino em̦m̦akũt jãn ijo. Innem em̦m̦aan ro rar l̦oorel̦o̦k ñan Betleem. “Iju” in ear bõjrak ilõñin juon em̦ im em̦m̦aan rein rar etal im del̦o̦ñ ñan lowaan m̦weo. Innem rar loe ajri eo Jesus ippãn Meri, kõrã eo jinen. Em̦m̦aan rein rar badikdik ñan ajri in im lel̦o̦k menin lel̦o̦k ko ñane ãinwõt gold im menin lel̦o̦k ko jet. M̦ool ke bwe Jeova ear jilkinl̦o̦k em̦m̦aan rein ñan ippãn ajri in, Jesus? Eokwe, ear jab.

Ilo boñõn eo, Jeova ear ba ñan Josep ilo juon ettõn̦ak im ba: ‘Herod ekõn̦aan m̦an Jesus. Kwõn bõk kõrã n̦e pãleem̦ im l̦adik n̦e nejũm̦ im kom̦win ko ñan Ijipt. Kom̦win kab pãd wõt ie ñan ñe inaaj ba ñan eok bwe em̦m̦an ñan ami bar ro̦o̦ltok.’ Kõn men in, Josep im baam̦le eo an rar m̦õkaj im etal ñan Ijipt.

Jeova ear jiroñ em̦m̦aan ro jãn Rear bwe ren jab jepl̦aak ñan ippãn Herod. Ke Herod ear kile bwe rein rar jab ro̦o̦ll̦o̦k ñan ippãn, ear lukkuun illu. Innem kõnke ear jab maroñ jel̦ã ia eo ajri eo Jesus epãd ie, ear kõm̦m̦ane juon kien bwe ren m̦an aolep l̦addik jiddik ro ilo Betleem me renaaj kar dettaer wõt Jesus. Ak ejjel̦o̦k jorrããn ekar wal̦o̦k ñan Jesus kõnke ear pãd ilo juon jikin elukkuun ettol̦o̦k ilo Ijipt.

 Tokãlik, Herod ear mej. Innem Jeova ear ba ñan Josep: ‘Em̦m̦an kiiõ ñan amijel ro̦o̦l.’ Kõn men in, Josep im Meri kab Jesus rar ro̦o̦l ñan Israel, im rar etal im jokwe ilo Nazeret.