Ipan altepemej tlen mokauayaya ika este tlen Israel, maseualmej moiljuiyayaj nopa sitlalimej ueliskiaj kinyakanasej. Se youali, se keskij tlakamej katli nopaya euayayaj, kiitakej ipan iluikak nesiyaya kej se sitlali tlen mojmolinijtiauiyaya, uan kitokilijtiajkej. Nopa “sitlali” kinuikak Jerusalén. Nopa tlakamej tlajtlantiauiyayaj: “¿Kanke itstok nopa okichpil katli kinnauatis judíos? Tijnekij timotlankuaketsasej iixpa”.

Kema Herodes, katli tlanauatiyaya ipan Jerusalén, kimatki tlakajtoya se yankuik tlanauatijketl, tlauel motekipachok. Kintlajtlanilik nopa sacerdotes katli tlayakanayayaj: “¿Kanke tlakatiskia nopa tlanauatijketl?”. Kinankilijkej: “Nopa tlajtolpanextianij kiijtojkej tlakatiskia Belén”. Uajka Herodes kinnotski nopa tlakamej katli ualayayaj tlen Oriente uan kiniljuik: “Xiakaj Belén uan xijtemokaj nopa okichpil. Teipa xinechiljuikij kanke itstok, pampa na nojkia nijneki nimotlankuaketsati iixpa”. Herodes san kinkajkayajki.

Nopa “sitlali” sampa pejki kinyakana nopa tlakamej, uan kinuikak Belén. Teipa, nopa “sitlali” moketsato ipan se kali, uan kema nopa tlakamej kalajkej, kiitakej nopaya itstoya Jesús uan inana María. Nopa tlakamej motlankuaketskej iixpa nopa pilokichpiltsi uan kimakakej tlen kiuikayayaj: oro, incienso uan mirra. ¿Timoiljuia nelnelia Jehová kintitlanki nopa tlakamej kampa itstoya Jesús? Amo.

Ipan nopa youali, ipan se temiktli Jehová kiiljuik José: “Herodes kineki kimiktis Jesús. Xiakaj Egipto, xijuika mosiua uan mokone. Uan nopaya ximokauakaj. Na niinmechiljuis kema uelis intlakuepilisej”. José uan ichampoyouaj nimantsi yajkej Egipto.

Jehová nojkia kiniljuik nopa tlakamej amo ma tlakuepilikaj kampa itstoya Herodes. Kema Herodes kimatki nopa tlakamej ayokmo tlakuepiliskiaj, tlauel kualanki. Uan pampa amo kipantik Jesús, tlanauatik ma kinmiktikaj nochi konemej katli kipixtoyaj sanse ininxiui kej Jesús. Maske tlanauatik nopa, Jesús amo tleno kipanok pampa itstoya Egipto.

 Teipa Herodes mijki. Uajka Jehová kiiljuik José: “Nama uelis intlakuepilisej”. José, María uan Jesús tlakuepilijkej Israel uan mochantitoj ipan altepetl Nazaret.