Vandhu vaigara ku mabvazuva ko Iziraeri vaitenda kuti ndhondho jaikwanisa kuvatungamirira. Usiku umweni, vanarume vamweni vaigara Kumabvazuva vakavona ciro caibhwaka inga ndhondho cecifamba-famba kudenga, ngo kudaro vakatanga kuciteverera. “Ndhondho” yondhoyo yakavaendesa ku Jerusarema. Vanarume vondhovo vakatanga kubvunjisa vandhu kuti: ‘Mwana anozova mambo ku Judha ari kwapi? Taviya komugwadamira.’

Herodhi, mambo wo Jerusarema, paakazwa ngo pamusoro po mambo mupsa, iyena wakacamwa maningi. Iyena wakabvunjisa vapiri vakuru kuti: ‘Mambo uu anozobahwa kwapi?’ Ivona vakamubvunja kuti: ‘Vaporofita vakananga kuti iyena waizobahwa Bheterehema.’ Ngo kudaro, Herodhi wakadanija vanarume vo Kumabvazuva zve wovabvunja kuti: ‘Endanyi Bheterehema zve psakanyi mwana uwo. Vianyi kondizivisa kuti ari kwapi. Ndinozoendavo komugwadamira.’ Asi awo ainga manyepo.

“Ndhondho” iya yakatanga kufamba inga zvayakaita pakutanga. Vanarume vakaitevera atee kuguma ku Bheterehema. “Ndhondho” yondhoyo yakaenda koima pa nyezuru po nyumba zve vanarume vakagwina mukati. Ivona vakawana Jesu na Mai wake, Maria. Ivona vakagwadamira mwana zve vakamupa zvipo, zvakadari inga goridhi , mira no mafuta anonuhira. Kureva kuti Jehovha wakatumiradi vanarume ava kuti vawane Jesu? Haiwa.

Pa usiku wondhowo, Jehovha wakabvunja Josefa mu hope: ‘Herodhi anoda kuuraya Jesu. Torai mukaji wako no mwana zve tiziranyi ku Ejipita. Garanyi kondhoyo mbhera ndimubvunje kuti muhwirire.’ Ngo kukasika, Josefa no mbhuri yake vakaenda ku Ejipita.

Jehovha wakabvunja vanarume vo Kumabvazuva kuti vatame kuhwirira ka Herodhi. Herodhi paakavona kuti vanarume vaya avacaiviya, wakanyangajwa maningi. Ngo kuti wainga acizivi kuwana Jesu, wakatumira kuti vauraye vana vese vo mupira wa Jesu vainga ku Bheterehema. Asi Jesu, wainga wakangwaririka ndhambo ku Ejipita.

 Pa kufamba ko nguva, Herodhi wakafa. Jehovha wakabvunja Josefa kuti: ‘Wari wakangwaririka kuti uhwirire.’ Josefa, Maria na Jesu vakahwirira ku Iziraeri zve vakaita nyumba yavo ku cimutundhu co Nazareta.