Ipan se yeuajli, sekimej tlakamej akin ualeuayaj ikisayan tonajli okitakej tlen nesiya kentla se sitlalin tlen melak petlaniya niman nouiyoniaya ipan iluikak. Kampa ualeuayaj noneltokaya ika sitlalimej ueliyaj teyekanaj. Kuakon okitokatiajkej. Yejuin “sitlalin” okinuikak Jerusalén. Tlakamej opeujkej tetlajtoltiaj: “¿Kanon nemi konetl akin yes intekiuaj judíos? Tiknekij ixpan totlakuanketsaskej”.

Ijkuak Herodes, tekiuaj itech Jerusalén, okikak itech se yenkuik tekiuaj, melak onotekipacho niman okintlajtolti teopixkej: “¿Kanon noijtoua ika tlakatis yejuin tekiuaj?”. Yejuamej okinankilijkej: “Teotlajtokej okijtokej ika tlakatiskia Belén”. Kuakon Herodes okiminnots tlakamej akin ualeuayaj ikisayan tonajli niman okimijli: “Xuiyan Belén niman xtejtemokan konetl. Sakin xuajmokuepakan niman xnechijlikij. Nejua noijki nikneki ixpan ninotlakuanketsas”. San ika, san tekajkayaujtoya.

“Sitlalin” oksejpa opeuj nouiyonia. Tlakamej okitokatiajkej hasta Belén. Kuakon “sitlalin” onotelti ikuatipan se kajli niman yejuamej ompa okalajkej niman okinextijkej Jesús iuan inan, María. Yejuamej onotlakuanketskej ixpan konetl niman okimakakej oro, tlen ajuiyak niman mirra. ¿Yemelak okintitlanka Jehová yejon tlakamej makinextitij Jesús? Ka.

Ipan yejon yeuajli, Jehová okinots José ipan se temiktli: “Herodes kineki kimiktis Jesús. Xkuika mosiuauj iuan mokoneuj niman xuiyan Egipto. Ompa xnemikan hasta ijkuak nimitsijlis ika iuelis oksejpa nemokuepaskej”. Nimantsin José niman ichanejkauan oyajkej Egipto.

Jehová okimijlika tlakamej akin ualeuayaj ikisayan tonajli ika maka manokuepakan itech Herodes. Ijkuak Herodes okitak ika yejuamej xnokuepaskiaj, melak okualan. Pampa xouel okinexti Jesús, otlanauati makinmiktikan nochimej kokonej akin kipiayaj san  noijki xiuitl ken Jesús. San ika, Jesús xtlaj ipan onochiuj, yejua nemiya Egipto.

Sakin, Herodes omik. Jehová okijli José: “Aman iuelis nemokuepaskej”. José, María niman Jesús onokuepkej Israel, niman onochantijkej ipan ueyikalpan Nazaret.