Abantu abahlala epumalanga yakwa-Israyeli bebakholelwa bona iinkwekwezi zingabatjengisa indlela. Ngobunye ubusuku babona into enjengekwekwezi ekhanyako, into leyo beyikhambakhamba emkayini, yeke bayilandela. Ikwekwezi leyo yabasa eJerusalema. Abantu bePumalanga labo bathoma ukubuza abantu ukuthi: ‘Uphi umntwana ozokuba yikosi yamaJuda? Sizele ukuzomkhothamela.’

UHerode ikosi yeJerusalema ithe nayizwa ngekosi etja leyo, yatshwenyeka khulu. Yabuza abaphristi abakhulu ukuthi: ‘Ikosi leyo izokubelethelwa kuphi?’ Bona bathi kiyo: ‘Abaphorofidi bathe izokubelethelwa eBhethelehema.’ Yeke ikosi uHerode yabiza amadoda avela ePumalanga yathi kiwo: ‘Iyani eBhethelehema niyokufuna umntwana loyo. Nibuye nizongitjela ukuthi ukuphi. Nami ngifuna ukumkhothamela.’ Bekakhuluma amala nakatjho njalo.

“Ikwekwezi” yathoma ukukhamba godu. Amadoda la ayilandela bekwaba seBethelehema. Ikwekwezi yafika yajama phezu komuzi, yeke amadoda la angena ngaphakathi. Afumana uJesu nonina uMariya ngendlini. Afika akhothamela umntwana amupha izipho, amupha igolide, itjhwalo nemire. Kghani vele nguJehova ebekathumela amadoda la bona afune uJesu? Awa akusi nguye.

Ebusukwinobo uJehova watjela uJosefa ngephupho wathi: ‘UHerode ufuna ukubulala uJesu. Thatha unakwakho nomntwana nibalekele eGibhide. Nifike nihlale lapho bekube kula nginitjela ukuthi ningabuyela emva.’ Akhenge asamotjha isikhathi, khonokho uJosefa nomndenakhe bakhamba baya eGibhide.

UJehova watjela amadoda wePumalanga la bona angabuyeli kuHerode. UHerode uthe angalemuka bona amadoda la akabuyi wasilingeka wazala ipoto. Njengombana bangamfumani uJesu wakhupha umyalo wokuthi akubulawe boke abasanyana abancani abalingana noJesu eBhethelehema. Kodwana ngesikhatheso uJesu bekaphephile, bekakude khulu eGibhide.

 Ngokukhamba kwesikhathi uHerode wafa. UJehova wathi kuJosefa: ‘Kwanje ungabuyela emva, sekuphephile.’ UJosefa, uMariya noJesu babuyela kwa-Israyeli, bayokuhlala edorobheni leNazaretha.