Nageng e nngwe ka bohlabela bja Isiraele, go be go na le batho bao ba bego ba dumela gore dinaledi di ka ba thuša. Bošegong bjo bongwe, banna ba bangwe bao ba tšwago ka Bohlabela ba ile ba bona selo seo okarego ke naledi se sepela kua lefaufaung. Ba ile ba šala selo seo morago gomme sa ba iša Jerusalema. Banna bao ba ile ba thoma go botšiša batho ba re: ‘O kae ngwana yo ba rego e tlo ba kgoši ya Bajuda? Re tlile go mo khunamela.’

Ge kgoši ya Jerusalema e lego Heroda a ekwa gore go na le ngwana yo e tlago go ba kgoši, o ile a galefa. Ke moka a botšiša baperisita ba bagolo a re: ‘Kgošinyana yeo go bolelwago ka yona e tlo belegelwa kae?’ Ba re go yena: ‘Baporofeta ba itše e tla belegelwa Betlelehema.’ Ka gona Heroda a bitša banna bale ba go tšwa ka Bohlabela gomme a re go bona: ‘Eyang Betlelehema gomme le nyake ngwana yoo. Ge le mo hweditše, le tle le mpotše gore o kae. Le nna ke nyaka go mo khunamela.’ Eupša kgoši Heroda o be a bolela maaka.

Ge ba feditše go bolela le Heroda, selo seo sa go swana le naledi se ile sa thoma go sepela. Banna bao ba ile ba se šala morago go fihla Betlelehema. Se ile sa ema ka godimo ga ntlo yeo ngwana yoo a bego a le ka go yona. Ke moka banna bao ba tsena ka ntlong yeo. Ba ile ba hwetša Maria a na le ngwana wa gagwe e lego Jesu. Ba ile ba khunamela ngwana yoo gomme ba mo nea dimpho, gauta, diorelo le senkgišabose seo se bitšwago mira. Na Jehofa ke yena a thušitšego banna ba gore ba hwetše Jesu? Aowa.

Bošegong bjoo, Jehofa o ile a botša Josefa torong a re: ‘Heroda o nyaka go bolaya Jesu. Tšea Maria mosadi wa gago le Jesu gomme le tšhabeleng Egipita. Le duleng moo go fihlela ke le botša gore le boe.’ Gateetee Josefa le lapa la gagwe ba ya Egipita.

Jehofa o be a boditše banna bale ba go tšwa ka Bohlabela gore ba se boele go Heroda. Ge Heroda a bona gore ga ba sa boa, a galefa kudu. Ka ge a be a sa tsebe gore Jesu o kae, o ile a laela gore bašemane ka moka ba go lekana le Jesu kua Betlelehema ba bolawe. Eupša ka nako yeo, Jesu o be a šireletšegile. O be a le kua Egipita.

 Ge nako e dutše e eya, Heroda o ile a hwa. Ke moka Jehofa a re go Josefa: ‘Ga bjale o ka boela gae. Heroda o hwile.’ Josefa, Maria le Jesu ba boela Isiraele gomme ba dula motseng wa Natsaretha.