Ízrel bikéyahdóó haʼaʼaahjígo kéédahatʼínígíí łaʼ sǫʼ yikʼehgo nidaakai. Éí Haʼaʼaahjígo łaʼ hastóí sǫʼ ayóó bitsʼádiʼnílííd yigáałgo dayiiłtsą́ągo yikééʼ dah diikai. “Sǫʼ” bikééʼ jookahgo Jerúsalemgi jíkai. Nidaʼídíłkidgo ádaaní: ‘Háadi Jew dineʼé binaatʼáanii dooleełii sídá? Bichʼįʼ náádadiʼyiilnih biniyé baa niikai.’

Hérad éí Jerúsalem binaatʼáanii nilı̨́įgo díidí yidiiztsʼą́ąʼgo nitseeltłah. Áko aláahgo náádaʼiiłniihii nabízhdééłkid: ‘Háadi Jew binaatʼáanii doochííł?ʼ Áádóó ádahodííniid: ‘Diyin God yá halneʼii yee akʼedaʼashchı̨́, Béthlehemgi doochííł daaní.ʼ Hérad éí Haʼaʼaahdę́ę́ʼ hastóí baa yíkaígíí ííłní: ‘Béthlehemgóó dookahgo awééʼ hadanohtá. Bikʼídanohkaigo shił nidahodoołnih. Áko shí ałdóʼ bichʼįʼ náádiyeeshnih nisin.’ Ndi díí yoochʼííd átʼé.

“Sǫʼ” dah náádiidzá. Hastóí éí Béthlehemgi bikééʼ jíkai. “Sǫʼ” éí hooghan léiʼ bikáaʼgi niiltłah, áádóó hastóí hooghan góneʼ yah ajookai. Jesus dóó bimá Mary dajiiłtsą́. Áádóó Jesus bichʼįʼ nitsidazdeezgoʼgo, óola dóó fránkinsens, índa mir baa dajiiznil. Jiihóvaásh díí hastóí Jesus hadeidínóotaał yiniyé ayííłʼaʼ? Ndagaʼ.

Tʼáá éí bitłʼééʼ Jiihóvah éí Jóseph nayiiyeełgo ííłní: ‘Hérad éí Jesus yidiyoołhééł nízin. Áko Ííjipgóó bił dooʼash. Áadi nahísóotą́ągo, nánóhkááh nihidííniidgo índa nidookah.’ Jóseph bighandóó tsxı̨́įłgo Ííjipgóó dashdiikai.

Jiihóvah éí hastóí Haʼaʼaahdę́ę́ʼ naakaígíí áyidííniid, Hérad doo bichʼįʼ nidookah da. Hérad doo há náʼíldeeʼgóó biniinaa háhóóchįįd. Tʼáá bí Jesus chʼééh háinéeztą́ąʼgo, ashiiké naaki  béédááhaidóó yaago nidootsił níigo iʼiisʼaʼ. Ndi Jesus éí tʼáá íídą́ą́ʼ Ííjipdi bił íldeeʼ.

Hérad daaztsą́ą́dóó bikʼijįʼ Jiihóvah éí Jóseph ííłní: ‘Kʼad doo áhootʼéhí da, Ízrelgóó nihéénóhkááh.ʼ Áádóó Jóseph, Mary dóó Jesus akǫ́ǫ́ níjíkaigo Názarethgi nizhníná.