En een Launt em Oosten von Israel wieren Menschen, waut jleewden, daut de Stierns eenem leiden kunnen. Eene Nacht sagen waut Mana vom Oosten een Licht, waut no een dachet Stiern sach un sikj bewäajen deed, un dee jinjen daut hinjaraun. Daut Stiern brocht dee no Jerusalem. De Mana forschten sikj rom: “Wua es daut Kjint, waut de Juden äa Kjennich sennen woat? Wie kjeemen häa toom dän Iea wiesen.”

Aus Herodes, de Kjennich von Jerusalem, von eenen nieen Kjennich hieed, wia dee sea besorcht. Dee fruach de Väaschte von de Priestasch: “Wua saul dis Kjennich jebuaren woaren?” Dee säden: “De Profeeten säden, dee wudd en Betlehem jebuaren woaren.” Herodes roopt de Mana vom Oosten un säd: “Got no Betlehem un sieekjt daut Kjint. Dan komt trigj un sajcht mie, wua daut es. Ekj well daut uk Iea wiesen.” Oba daut wia jeloagen.

Daut Stiern trock wada wieda. De Mana jinjen daut hinjaraun no Betlehem. Bowa een Hus hilt daut Stiern stell un de Mana jinjen doa nenn. Doa sagen dee Jesus un siene Mame Maria. Dee bekjten sikj ver daut Kjint un jeewen daut Golt, Weiruak un Mirren. Haud Jehova dise Mana no Jesus jebrocht? Nä.

Dee Nacht säd Jehova en eenen Droom to Josef: “Herodes well Jesus dootmoaken. Nemm diene Fru un dienen Sän un brinjt junt fuat no Ägipten. Blieft doa, bat ekj die saj, jie kjennen trigjkomen.” Josef un siene Famielje reisden fuaz no Ägipten.

Jehova haud de Mana vom Oosten jesajcht, see sullen nich trigj no Herodes gonen. Aus Herodes daut enwort, daut dee nich wieren trigjekomen, wia dee wuttich doll. Wäajen dee Jesus nich funk, leet dee en Betlehem aule kjliene Junges dootmoaken, waut sea soo oolt wieren aus Jesus. Oba Jesus wort nuscht; dee wia wiet auf en Ägipten.

 Lota storf Herodes. Jehova säd dan to Josef: “Nu kjenn jie wada en Fräden trigjreisen.” Josef un Maria un Jesus reisden trigj no Israel un muaken sikj en de Staut Nazaret tus.