Kʼo jun ulew pa ri Oriente re Israel chilaʼ ri e winaq kkikojo che ri e chʼumil kkikʼam kibʼ e ri winaq. Jun chaqʼabʼ, jujun achijabʼ re Oriente xkil jun chʼumil che tajin ksilabʼ cho ri kaj, tekʼuriʼ xkiterenej bʼik. Ri «chʼumil» xukʼam kibʼe pa Jerusalén. Ri e achijabʼ kkitaʼ chke ri winaq pa ri bʼe: «¿Jachiʼ kʼo wi ri akʼal che kux na ajawinel kech ri judíos? Kqaj kojxukiʼ chuwach».

Herodes, ajawinel re Jerusalén, xuta ri tzij chrij ri kʼakʼ ajawinel. Sibʼalaj xuxibʼij ribʼ xutaʼ chke ri e ajkojol tabʼal toqʼobʼ: «¿Jachiʼ kalax wi ri ajawinel riʼ?». E areʼ xkibʼij che: «Ri e ajqʼaxal taq tzij xkibʼij che kalax pa Belén». Rumal laʼ Herodes xeʼusikʼij ri achijabʼ re Oriente xubʼij chke: «Jix pa Belén chitzukuj ri akʼal. Tekʼuriʼ kixtzalij loq kibʼij chwe jachiʼ kʼo wi, rumal che in xuqujeʼ kwaj kinexukul chuwach». Are kʼu are jun bʼanoj tzij.

Ri «chʼumil» jumul chik xumaj silabʼem, ri achijabʼ xkiterenej bʼi kʼa pa Belén. Tekʼuriʼ ri «chʼumil» xqaj pa uwiʼ jun ja, ri achijabʼ xeʼok pa ri ja xkiriq Jesús rukʼ ri unan, María. E areʼ xexukiʼ chuwach ri akʼal xuqujeʼ xkiya sipanik che: qʼan pwaq, incienso xuqujeʼ mirra. Are kʼu ¿la are qastzij che are Jehová xekʼamow bʼi ri achijabʼ riʼ rukʼ Jesús? Are taj.

Pa ri chaqʼabʼ riʼ, Jehová xubʼij che José pa jun achikʼ: «Herodes kraj kukamisaj Jesús. Chakʼamaʼ bʼi ri awixoqil xuqujeʼ ri akʼojol, jix pa Egipto. Chixkanaj kan chilaʼ kʼa kqʼax na ri kʼax». Rumal laʼ José rukʼ ri ufamilia aninaq xebʼe pa Egipto.

Xuqujeʼ, Jehová xubʼij chke ri achijabʼ re Oriente che ketzalij ta chi rukʼ Herodes. Are chiʼ Herodes xretaʼmaj che ketzalij ta rukʼ, sibʼalaj xpe royowal. Rumal che xkun ta che uriqik Jesús, xtaqan che kikamisaxik konojel ri akʼalabʼ re Belén che junam kijunabʼ rukʼ Jesús. Are kʼu kʼo ta xuriq Jesús rumal che naj chi kʼo wi, pa Egipto.

 Xqʼax ri tiempo, Herodes xkamik. Tekʼuriʼ Jehová xubʼij che José: «Kʼo ta chi kʼax. Kixkunik kixtzalijik». José, María xuqujeʼ Jesús xetzalij pa Israel xekanaj kan pa ri tinamit re Nazaret.