Israel llajtapi inti llujshij ladopi causajcunaca luzerocunami maita rina cashcata ricuchin nijcunami carca. Shuj tutaca chaipi causaj cꞌaricunaca achij nicuj luzero laya cuyurijtami ricurcacuna. Chai luzerota catishpami chai cꞌaricunaca Jerusalenman chayarcacuna. Paicunaca, ‘judiocunata mandagrijca ¿maipitaj can? Paitami adorasha ninchij’ nishpami gentecunata tapurcacuna.

Jerusalenta mandaj Herodesca mushuj reymanta uyashpaca achcatami sustarirca. Chaimantami sacerdotecunata mandajcunataca, ‘¿maipitaj chai mandajca huacharina carca?’ nishpa tapurca. Paicunaca, ‘profetacunaca Belén pueblopimi huacharinga ninmi’ nircacunami. Chashna nijpimi Herodesca luzerota catij cꞌaricunata cayashpaca, ‘Belén puebloman richij. Huahua maipi cashcata alli tapunguichij. Japishpaca huillanaman shamunguichij, ñucapish paita adorasha ninimi’ nirca. Pero paica llullacurcami.

Chai luzero cutin cuyurishpa rijpimi chai cꞌaricunaca catishpa, Belenman chayarcacuna. Chaipimi luzeroca shuj huasi jahuapi shayarirca. Chai huasiman yaicushpami chai cꞌaricunaca Jesustapish paipaj mamatapish ricurcacuna. Paicunaca huahuapaj ñaupajpi cumurishpami orota, inciensota, mirratapish curcacuna. Pero ¿Jehovachu chai cꞌaricunata Jesuspajman cachashca canga? Mana.

Chai tutaca Diosca shuj muscuipimi Josetaca, ‘jatari, huahuata paipaj mamandij pushashpa Egiptopi miticugri. Herodesca huahuata huañuchisha nicunmi. Ñuca cutin huillangacama chaipi saquiringuichij’ nirca. Chai ratomi Josepish paipaj familiapish Egiptoman rircacuna.

Jehová Diosca chai cꞌaricunataca Herodespajman ama tigranguichij nircami. Mana tigramujta yachaj chayashpaca Herodesca achcatami pꞌiñarirca. Jesusta mana japi tucushcamantapish Belenpi caj tucui uchilla huahuacunatami huañuchinaman cacharca. Pero Jesusca ña Egiptopi cashcamantami mana ima tucurca.

Huatacuna pasajpica Herodesca huañurcami. Jehová Diosca Josetaca, ‘huañuchijcunaca  ña mana tiyanchu, tigraichijlla’ nircami. Chaimi José, María, Jesuspish Israel llajtaman tigrashpa Nazaretpi causarcacuna.