Israel nacionmanta intipa lluqsimunan lawpi yachaq runakunam lucerowan pusachikuqku maymanpas. Chay runakunam huk tuta sumaqllaña achkiq lucerota qatispanku Jerusalenman chayarurqaku, hinaspam runakunata tapurqaku: “¿Maypitaq kachkan judiokunata kamachinanpaq naceq wawaqa? Ñawpaqninpi kumuykuytam munaniku”, nispa.

Jerusalenta kamachiq Herodesñataqmi yacharurqa chay kamachiq nacesqanmanta. Chaymi hukmanyaruspan riqsisqa sacerdotekunata tapurqa chay kamachiq maypi nacenanmanta. Paykunañataqmi nirqaku: “Diosmanta willakuqkunam nirqaku Belen llaqtapi nacenanmanta”, nispa. Chaynapim Herodesqa lucerowan pusachikuq runakunata kamachirqa chay wawata maskamunankupaq, hinaspam llullakuspan nirqa: “Tariruspaqa willawankichikmi, ñuqapas ñawpaqninpi kumuykamunaypaq”, nispa.

Chaynapim chay runakunaqa kaqmanta “lucerota” qatispa Belenman chayarurqaku. Chay luceropa sayasqan lawpim Jesustawan maman Mariata tarirurqaku, hinaspam wawapa ñawpaqninpi kumuykuspanku qurqaku: Qurita, inciensota hinaspa miski asnaq sachakunapa wiqinta. Ichaqa chay lucerowan pusachikuq runakunataqa manam Jehova Dioschu kacharqa.

Chaymi chay tuta Jehova Dios Joseyman musquyninpi willarqa: “Herodesmi wawata maskachkan wañuchinanpaq, chayraykuyá wawata mamantinta Egipto nacionman ayqichiy. Amam kutimunkichikchu Herodes wañunankama”, nispa. Chaymi Joseyqa chaylla kasukurqa.

Chaymantapas Diosqa chay lucerowan pusachikuq runakunatam nirqa Herodesman amaña kutinankupaq. Chaymi Herodesqa mana kutiptinku llumpayta piñakururqa, hinaspam kamachirqa Belen llaqtapi iskay watayuqmanta urayman lliw qari wawakunata wañuchinankupaq,  chaynapi Jesuspas wañunanpaq. Chaywanpas Jesustaqa manam wañuchirqakuchu.

Herodes wañuruptinmi Joseyta Jehova Dios nirqa: “Kunanqa kutiwaqchikñam”, nispa. Chaymi Joseywan Mariaqa Jesuspiwan kutispanku Nazaret llaqtapi yacharqaku.