Ki jekh phuv ko istočno Izrael živinena sine manuša kola so verujnena sine kaj o zvezde šaj te vodinen len. Jekh rat, nekobor manuša taro Istok dikhle nešto so ličinela sine sar sjajno zvezda so dvižinela pe ko nebo hem počmingje te džan pali late. I „zvezda“ ingargja len ko Erusalim. Ola pučle e manušen: „Kaj tano o čhavo so ka ovel cari e Evreenge? Alem te poklonina amen leske“.

Keda o Irod, o cari so sine ko Erusalim, šungja bašo nevo cari, but sine sekirimo. Ov pučlja e glavna sveštenikon: „Kote valjani te bijangjovel akava cari?“ Ola vakergje leske: „O prorokija pišingje kaj ka bijangjovel ko Vitleem“. Tegani o Irod vikingja nekobor manušen taro Istok hem vakergja lenge: „Džan ko Vitleem hem arakhen adale čhave“. Iranen tumen hem vakeren mange kaj tano. Mangava me da te džav te pokloninav man leske. Ama, adava sine hovajbe.

I „zvezda“ počmingja te dvižinel pe. O manuša džana sine pali late sa dži ko Vitleem. I „zvezda“ ačhili upro jekh kher hem o manuša khuvgje andre ko kher. Ola arakhle andre e Isuse pe daja, e Marijaja. Ola pokloningje pe e čhaveske hem dengje le poklonija taro zlato, temjan hem smirna. Dali o Jehova bičhalgja akale manušen te arakhen e Isuse? Na.

Adaja rat, o Jehova vakergja e Josifeske ko suno: „O Irod mangela te mudarel e Isuse. Le te romnja hem te čhave hem našen ko Egipet. Ačhov adari sa džikote na vakerava tuke te irane tut. O Josif hem leskiri familija odma gele ko Egipet.

O Jehova vakergja e manušenge taro Istok te na iranen pe ko Irod. Keda o Irod dikhlja kaj na irangje pe, but holjangja. Adaleske so našti sine te arakhel e Isuse, dengja zapoved sa o murša čhave soj ko Vitleem hem tane vrsnikija e Isusea, te oven mudarde. Ama, o Isus sine spasimo, sine dur, ko Egipet.

 Palo nesavo vreme, o Irod mulo. O Jehova phengja e Josifeske: „Akana šaj te irane tut“. O Josif, i Marija hem o Isus irangje pe ko Izrael, hem živinena sine ki diz Nazaret.