Ki jekh phuv, istočno ando Izrael, živindže o manuša kola verujindže so šaj o zvezde te vodinen ljen. Jekh rat, nekobor manuša ando istok dikhlje diso so ličindža sar sjajno zvezda so svetlini ko nebo hem počmindže te džan palo late. I „zvezda“ igardža ljen ko Jerusalim. On pučlje e manušen: „Kaj tano o čhavo so ka ovel kralj e Jevrejendže? Amen aljam te poklonina amen oljese.“

Ked o Irod, kova hine kralj ko Jerusalim, šundža ando nevo kralj, but hine sekirimo. Ov pučlja e glavna sveštenikonen: „Kaj valjani te bijandžol akava kralj?“ On phendže ljese: „O prorokija pisindže so ka bijandžol ko Vitlejem.“ Tegani o Irod vičindža nekobor manušen ando istok hem phendža ljendže: „Džan ko Vitlejem hem arakhen odolje čhave. Palo odova, irinen tumen koro mande hem vačeren maje kaj tano. Mangava hem me te džav te pokloninav man oljese.“ Ama, odova hine hovajbe.

I „zvezda“ paljem počmindža te svetlini. O manuša dželje palo late sa dži o Vitlejem. I „zvezda“ ačhilji upro jekh čher hem o manuša khuvdže andre ko čher. On arakhlje andre e Isuse pe dajaja, e Marijaja. Poklonindže pe e čhavese hem dindže lje poklonija ando zlato, tamjan hem smirna. Da li o Jehova bičhaldža akalje manušen te arakhen e Isuse? Na.

Odija rat, o Jehova phendža e Josifese ko suno: „O Irod mangela te mudari e Isuse. Lje te romnja hem te čhave hem našen ko Egipat. Ačhov uduri sa dži na vačerava tuče te irine tut.“ O Josif hem oljesi porodica odmah dželje ko Egipat.

O Jehova phendža e manušendže ando istok te na irinen pe ko Irod. Ked o Irod dikhlja so na irindže pe, but holjandža. Odoljese so naštindža te arakhi e Isuse, dindža zapovest sa o murša čhave kola tane ko Vitlejem hem kola tane vrsnikija e Isuseja, te oven mudarde. Ama, o Isus hine ko sigurno than sose hine dur, ko Egipat.

 Palo disavo vreme, o Irod mulo. O Jehova phendža e Josifese: „Akana šaj te irine tut.“ O Josif, i Marija hem o Isus irindže pe ko Izrael hem živindže ki diz Nazaret.