Андэ ек ԥув по востоко лэ Израилёстар жувэнас и мануша, савэ патянас, кай через и черӷай вонэ уӷанэна, со трэбуй тэ терэн. Еқвар и рят вонэ додиқлэ по нэбо, со шоласпэ пэ черӷай. Вой фартэ ԥаболас и вонэ жылэ кордэ, каринг и черӷай сыкавэлас. Кода, со шоласпэ пэ черӷай, андя лэн андо Иерусалимо. И мануша анда Востоко линэ тэ пушэн кодэлэндар, ко жувэл андо Иерусалимо: «Кай о бэято, саво авэла иудейско царё? Амэ камас тэ тэлювас лэсти».

О Иродо, саво правияс андо Иерусалимо, ашундя пала нэво царё, и фартэ пэрэдарайля. Во пушля кай и барэ рашая: «Кай трэбуй тэ арақадёлпэ кадэва царё?» Вонэ ԥэндэ: «И пророкоря ԥэнэнас, кай во трэбуй сас тэ арақадёлпэ андо Вифлеемо». О Иродо ақардя каринг пэстэ лэ манушэн, савэ анда Востоко и ԥэндя лэнди: «Жан андо Вифлеемо и виарақэн кадэлэ бэятос. Тоди рисавэн каринг мандэ и ԥэнэн, кай во жувэл. Мэ кадяжэ камав лэсти тэ тэлював». Но во лэнди хохадя.

Кода, со шоласпэ пэ черӷай, упалэ ля тэ жал. И черӷай андя кадэлэ манушэн андо Вифлеемо. И черӷай терделя понад ек цэр. И мануша анда Востоко зажылэ андэ кадэва цэр и додиқлэ котэ лэ Иисусос и лэстиря да ла Мария. Вонэ тэлелэ лэ бэятости и динэ лэсти сомнак, ладано и мирра. Ко андя каринг о Иисусо кадэлэ манушэн? О Иегова лэн андя? Най.

Андэ кодэя же рят о Иегова ԥэндя лэ Иосифости андо суно: «О Иродо камэл тэ умарэл лэ Иисусос. Лэ пэстиря хулая, лэ бэятос и наш андо Египто. Ашпэ котэ, дэкин мэ тути на ԥэнава, кала тэ риспэ». О Иосифо и лэско ери йто жылэ андо Египто.

О Иегова ԥэндя лэ манушэнди, савэ анда Востоко, кай вонэ тэ на ринпэ каринг о Иродо. Кала о Иродо поля, кай вонэ на ринапэ, во фартэ росхоляйля. Кадя, сар во нащи виарақэлэса лэ Иисусос, во приԥэндя тэ умарэн андо Вифлеемо всаворэ шаворэн, савэнди  сас скати же бэрш, сар лэ Иисусости. Но о Иисусо андэ кодэя время сас дур, андо Египто.

Прожыля время и о Иродо муля. О Иегова ԥэндя лэ Иосифости: «Акана тумэ тэ ринпэ палпалэ». О Иосифо, и Мария и о Иисусо рисайлэ андо Израилё и линэ тэ жувэн андо Назарето.