Kumabulukiro a dzuwa a Israeli kukhali na anthu akuti akhakhulupira kuti nyenyezi zinakwanisa kuatsogolera. Ntsiku inango namasiku, amuna anango akubuluka ku Mabulukiro a Dzuwa aona cinthu cakuyetimira kudzulu ninga nyenyezi mbacikafamba. “Nyenyezi” ineyi yaatsogolera mpaka ku Yerusalemu. Amuna anewa atoma kubvundzisa anthu: ‘Ali kupi mwana wakuti anadzakhala mambo wa Ayuda? Tabwera toera kumpasa miyoni.’

Mudabva mambo Herodhi wa ku Yerusalemu, thangwi ya mambo mupswa, iye adzudzumika kakamwe. Iye abvundza akulu a anyantsembe: ‘Ali kupi mwana adabalwa wakuti anadzakhala mambo?’ Iwo atawira: ‘Aprofeta alonga kuti iye mbadabalwa ku Bhetelehemu.’ Natenepa, Herodhi acemeresa amuna a ku dziko yakutali mbaapanga: ‘Ndokoni ku Bhetelehemu mukaone mbuto idabalwa mwana. Mungan’gumana bwerani mudzandipange kuna iye. Ndisafunambo kumpasa miyoni.’ Mbwenye unoyu ukhali uthambi.

Nyenyezi yatoma pontho kufamba. Amuna atowera nyenyezi mpaka ku Bhetelehemu. Nyenyezi yalimira padzulu pa nyumba, buluka penepo amuna apita n’nyumba ineyi. Iwo agumana Yezu na mai wace, Mariya. Iwo agodamira Yezu mbampasa miyoni ya ouro na inango yadidi kakamwe. Kodi ndi Yahova adatuma amuna anewa toera kugumana Yezu? Nkhabe.

Ntsiku ineyi namasiku, Yahova apanga Zuze mu ndoto: ‘Herodhi asafuna kupha Yezu. Kwata nkazako na Yezu muthawire ku Ejito. Khalani kweneku mpaka ntsiku inakupanga ine toera kubwerera.’ Mwakucimbiza, Zuze na banjace aenda ku Ejito.

Yahova apanga amuna adabuluka ku dziko yakutali toera akhonde kubwerera kuna Herodhi. Mudadziwa Herodhi kuti iwo nee mbadabwerera, aipirwa kakamwe. Nakuti nee akhadziwa kukhali Yezu, iye alonga kuti anapiana  onsene a mu Bhetelehemu akuti akhali na thunga ya Yezu aphiwe. Mbwenye Yezu apulumuswa pikhali iye ku Ejito.

Mudafa Herodhi, Yahova apanga Zuze: ‘Cincino, bwererani pyanu.’ Zuze, Mariya na Yezu abwerera ku Israeli mbaenda kakhala mu nzinda wa Nazareti.