Israeelete soojjaatoonni, beeddahe doogo leellishshannonke yee ammananno manni no. Mitto hashsha, mitu Soojjaati manni mittu beeddakko lawannorichi gordu aana haˈranna lae hattenne beeddakko hoode haˈri. Hatti “beeddakko” insa Yerusaalamete katama haadhe hadhinonsa. Insa manna togo yite xaˈmitu: ‘Kumbuullammosira dangoommonna, Ayihudete moote ikkanno qaaqqi hiikko no?’

Yerusaalamete moote Heeroodisi haaro moote daafira macciishshiti lowo geeshsha waajji. Isi kakkalaanote roorroota, ‘Ilamino yini moote noohu hiikkooti?’ yee xaˈmi. Kakkalaanote roorrooti, ‘Masaalaano isi Beetelihemete ilamanno yite masaaltino’ yitusi. Konni daafira, Heeroodisi Soojjaatinni dayino manna woshshe togo yiinsa: ‘Beeteliheme hadhine qaaqqu noowa hasse. Anino mare kumbuuleemmosina affiniro daggine kulleˈˈe.’ Kayinni isi hatto yiinohu doganniiti.

“Beeddakko” xaano noowiinni kaˈe hadhu. Soojjaatinni dayino manni ise harunsanni Beeteliheme iilli. “Beeddakko” qaaqqu noowa iillituti uurritu; hakkiinni ise hoode dayino manni minira ei. Insa Yesuusi amasi Maariyaami ledo nooha affu. Hakkiinni insa Yesuusira kumbuultu; hattono culka, hixaananna kaarbe uyitinosi. Konne manna Yesuusiwa soyinohu Yihowaatini? Deeˈni.

Hakko hashsha Yihowa Yooseefira haaqeetenni togo yiisi: ‘Heeroodisi Yesuusa shaara hasanni no. Konni daafira galtekkinna qaaqqo haadhe Gibitsete gobba xooqi. Ani kulammohe geeshsha hakko heeˈri.’ Yooseefi hakkawoyintenni minisi manni ledo Gibitse haˈrino.

Yihowa Soojjaatinni dayino manna, ‘Galagaltine Heeroodisiwa martinoonte’ yiinsa. Heeroodisi, insa galagalte isiwa martanni nookkita afiti lowo geeshsha giiramino. Isi Yesuusi noowa afinokki daafira, Beetelihemete heedhannota Yesuusi darawo ikkitinore  labballo qaaqquulle baala shine gundanni gede hajaji. Yesuusi Gibitsete gobbara noo daafira ikkinori dino.

Yannate gedensaanni Heeroodisi reyi. Yihowa Yooseefi, ‘Xa gobbakki higi’ yiisi. Yooseefi, Maariyaaminna Yesuusi Israeelete gobba higi; hakkiinni insa Naazireetete katamira heeˈrino.