Taumata su wanua sěmběkang daki bọu Israel mangimang bituing botonge měngahạ si sire. Piạ su sěhěbi, pirang katau esẹ bọu banua sěmběkang Daki nakasilo piạ tualagẹ̌ su langị kere bituing. Su tempong ”bituing” ene něngal᷊ing, i sire timol᷊e bituing ene. ”Bituing” ene něngahạ si sire sarang Yerusalem. I sire nẹ̌kiwal᷊o su taumata sene, ’Su apa rariọ kụ sarung makoạ datung tau Yahudi? I kami naramahi gunang měngadatẹ̌ si sie.’

Su tempong i Herodes, datung Yerusalem, nakaringihẹ̌ sarung piạ datu wal᷊inẹ, i sie sěbạe giměnggang. I sie nẹ̌kiwal᷊o su manga imang, ’Su apa rariọ kụ sarung makoạ datu ene malahirẹ̌?’ I sire simimbahẹ̌, ’Manga nabi naul᷊ị i sie sarung malahirẹ̌ su Betlehem.’ Herodes nẹ̌kui manga esẹ bọu sěmběkang dakị ene kụ nẹ̌bera si sire, ’Dakọe sarang Betlehem kụ pědeạ anạ ene. Bọu ene pěhabarẹ̌ si siạ su apa anạ ene. Iạ lai mapulu měngadatẹ̌ si sie.’ Katewe ene kai konting i Herodes.

”Bituing” ene saụ něngal᷊ing. Manga esẹ ene turusẹ̌ timol᷊e ”bituing” ene sarang nahumpạu Betlehem. Bọu ene, ”bituing” ene natanạ su wowong sěmbaụ bal᷊e, kụ manga esẹ ene simuẹ̌ su wal᷊e ene. I sire nakasilo si Yesus dingangi mamạe, i Maria. I sire nẹ̌tumpěkuhẹ̌ su těngong i Yesus kụ něgělị si sie hadiah wul᷊aeng, kemenyan, dingangu mur. Apa manga esẹ ene nirolohi Yehuwa gunang mědeạ si Yesus? Tala.

Su hěbi ene, Yehuwa nẹ̌bisara si Yusuf bọu ipi, ’I Herodes mapulu měmate si Yesus. Bawa kawingu dingangu anạu sarang Misirẹ̌. Pẹ̌tanạe sene sarang Iạ maul᷊ị kěbị seng aman.’ I sire tělu apidu nakoạ sarang Misire.

Yehuwa nẹ̌sěding su manga esẹ bọu sěmběkang Daki mẹ̌bal᷊ị sarang i Herodes. Hakị u ene i sire tawe  nẹ̌bal᷊ị, kụ i Herodes sěbạe nẹ̌pědu. Ual᷊ingu tawe nakaěbạ si Yesus, i sie něngoro kěbị anạ esẹ su Betlehem apang umure mẹ̌sul᷊ung dingangi Yesus pakipate. Katewe, i Yesus aman su Misirẹ̌.

Samurine, i Herodes nate. Yehuwa nẹ̌bera si Yusuf, ’I kamene seng botonge mẹ̌bal᷊ị.’ I Yusuf, Maria, dingangi Yesus nẹ̌bal᷊ị sarang Israel, kụ nẹ̌tanạ su Nazaret.