Tamy ty tane raike atignana Israely agne, le nisy ndaty nino fa afake mitari-dalagne iareo o kintagneo. Ie tamy ty halegne raike, le nisy lahilahy tsiampeampe nahatrea raha mazava mitovy amo o kintagneo sady nandehandeha tamy i lagnitsey ey. Norihe iareo i kintagney, le nitarike iareo mba Jerosalema mbeo. Nagnontane ze ndaty tao iareo tie: ‘Aia ty misy i ajaja ho mpanjaka o Jiosio zao? Hiankohoke ama’e ty lia’ay atoy.’

I Heroda ty mpanjaka i Jerosalema tamy izay. Naho fa nirei’e fa hisy mpanjaka vaovao, le natahotse reke. Nagnontenea’e ty lahibey o mpisorogneo tie: ‘Aia ty hahateraha o ajaja ho mpanjaka zao?’ Le hoe iareo: ‘Hoe o mpaminanio tie a Betlehema agne.’ Tinoka i Heroda amy izay i lahilahy boake atignanagne agne rey, le hoe reke: ‘Mandehana mba Betlehema mbeo nareo hagnente o ajaja zao, le miheregna atoy hirehake amako ty misy aze mba hiankohofako ama’e ka.’ Faie vande’e zay.

Tinary i kintagney mba Betlehema mbeo i lahilahy rey. Nijanogne tambone ty tragno nisy i Jesosy amy izay i kintagney. Nizilike tao iareo, le nahatrea i Maria naho i Jesosy. Niankohoke tagnatreha i ajajay eo iareo, le nagnomey aze volamena, raha magnitse naho miora. Faie i Jehovah vao ty nagnirake iareo? Aha’a.

Nisaontsia i Jehovah tamy ty nofy ty Josefa tie: ‘Te hamono i Jesosy ty Heroda. Ento milay a Ejipta agne o valy aman’ana’ò. Ko moly hey nareo naho tsy izaho ty mirehake anareo tie molia.’ Le avy le nente i Josefa nilay agne i keleia’ey.

Nisaontsia i Jehovah tamy ty nofy ka i lahilahy rey mba tsy hiheregne amy i Heroda agne. Niboseke ty Heroda naho fa tsy niheregne iareo. Naho fa tsy fanta’e tie aia ty misy i Jesosy, le nampamonoe’e ze ajaja mitovy taogne amy i Jesosy a Betlehema ao. Faie fa tsy tao sasa ty Jesosy.

 Naho fa nimate ty Heroda, le hoe ty Jehovah tamy i Josefa: ‘Molia amy izay nareo.’ Noly ta Israely agne amy izay ty Josefa naho ty keleia’e sady nipetrake ta Nazareta tao.