Ior mba sha ityoughkitaregh, ica a tar u Iserael, yange ve na jighjigh ér asan a sha kwavaôndo aa fatyô u tesen ve gbenda. Nahan tugh mbu gen yô, ior mba sha Ityoughkitaregh mbagenev nenge kwagh mondo iwanger lu karen sha kwavaôndo er ka ishan nahan. Maa ve mough ve gba zan ape “ishan” shon lu yemen la. “Ishan” ne yem a ve zan zan ve za nyôr ken Yerusalem. Tsô ve gba pinen ior ér: ‘Wan u i sember maren ér a va lu tor u Mbayuda la ngu hana? Se va ser se va sugh un.’

Herode, u lu tor u Yerusalem la, yange ungwan kwagh u tor u he ne yô, ishima za un iyol tsung. Nahan a pine upristi mba tamen ér: ‘Ka han i gbe u a maa tor shono?’ Ve kaa a na ér: ‘Uprofeti yange ve kaa ér a mar un ken Betelehem.’ Herode maa yila ior mba sha Ityoughkitaregh mbara, kaa a ve ér: ‘Za nen ken Betelehem. Nea zua a wan shon yô, hide va ôrom nen ape a lu la. Mo kpa m soo u za sughun un.’ Kpa lu aie.

Tsô ior mbara shi nenge “ishan” la gba yemen. Maa ve dondo i zan zan ve za nyôr ken Betelehem. “Ishan” shon kar za tile sha ityough ki iyou igen jigh jigh, ior mbara maa kar nyôr ken iyou shon. Maa ve nenge Yesu lu vea mama na, Maria. Nahan maa ve sugh wan na Yesu, shi ve na un iyua sha zenaria man akaa a human doon. Mimi je, ka Yehova yange tindi ior mbara ér ve za fa ape Yesu lu la yee? Ei.

Hen tugh mbura je, Yehova kaa a Yosev ken mnya ér: ‘Herode soo u wuan Yesu. Nahan tôô kwase wou kua wan wen, yevese yem nen ken Igipiti. Za lu nen ker zan zan me va kaa mer hide nen, zayol kera ngu ga.’ Fese je maa Yosev yem vea tsombor na ken Igipiti.

Yehova yange kaa a ior mba sha Ityoughkitaregh mbara ér ve de kera hiden hen Herode ga. Herode va fe ér ior mbara kera mba hiden hen a na ga yô, ishima vihi un tsung. Er Herode fa ijiir i Yesu lu la jighilii ga yô, a na zwa i wua mbayevnomso mba kiriki mba ken  Betelehem, mba yange i mar ve shighe môm a Yesu la cii. Kpa Yesu yô, kwagh er un ga. Yange za lu ken Igipiti ica.

Shighe karen yô, Herode kpe. Tsô Yehova kaa a Yosev ér: ‘Hegen zayol kera ngu ga. Nahan cin hide.’ Tsô Yosev man Maria man Yesu hide yem ken Iserael, ve kar ve za tema ya hen geri u Nasareti.