Lo wodja ɔmɔtshi wa lo ɛstɛ k’Isariyɛlɛ aki anto amɔtshi waketawɔka dia tɔɔtɔ kokaka mbalɔmbɔla. L’otsho ɔmɔtshi, apami amɔtshi w’oma lo Ɛstɛ wakɛnyi ɛngɔ kɛmɔtshi kele oko yɔɔtɔ yahɛta yatakɛndakɛnda l’olongo ndo vɔ wakayiyele. “Yɔɔtɔ” yakaalɔmbɔla polo la Jɛrusalɛma. Apami asɔ wakatatɛ mimbola anto ɔnɛ: ‘Lende ele ɔna layoyonga nkumekanga k’ase Juda? Takaye dia ndjookusamɛ.’

Lam’akoke Hɛrɔdɛ, nkumekanga ka Jɛrusalɛma lokumu lendana la nkumekanga k’oyoyo, nde akayakiyanya efula. Nde akambola ewandji w’ɛlɔmbɛdi ate: ‘Lende akoka nkumekanga kɛsɔ mbotɔ?’ Vɔ wakawotɛ vate: ‘Amvutshi wakate dia nde ayotɔ la Bɛtɛlɛhɛma.’ Ɔnkɔnɛ, Hɛrɔdɛ akelɛ apami w’oma lo Ɛstɛ ndo akawatɛ ate: ‘Nyotshu la Bɛtɛlɛhɛma ndo nyotende ɔna ɔsɔ. Kanyokawole ndjombitɛ lɛnɛ eende. Dimi nangaka tookusamɛ ndo dimi lawɔ.’ Koko ɔsɔ aki kashi.

“Yɔɔtɔ” shɔ yakatatɛ nkɛndakɛnda nto. Apami asɔ wakakiyele polo la Bɛtɛlɛhɛma. “Yɔɔtɔ” shɔ yakatemala laadiko dia luudu lɔmɔtshi, ko apami akɔ wakɔtɔ l’etei. Vɔ wakatotana Yeso kaamɛ la Mariya wa nyango. Ko wakakusamɛ ɔna ɔsɔ ndo wakawosha weshasha wa paonyi, tshɔ ndo mirɛ. Onde Jehowa mɛtɛ mbakatome anto asɔ dia tɛnana la Yeso? Ndooko.

L’otsho ɔsɔ, Jehowa akatɛ Yɔsɛfu lo dɔ ate: ‘Hɛrɔdɛ ekɔ lo nanga ndjaka Yeso. Ɔsa wadɛyɛ la ɔna kele nyolawɔ l’Edjibito. Kanyototshikale lɛkɔ polo lam’ayomonyotɛ dia aya dimɛna nyu nkalola.’ Mbala kakɔ ɔtɔi, Yɔsɛfu la nkumbo kande wakatshu l’Edjibito.

Jehowa akatɛ apami wakaye oma lo Ɛstɛ dia vɔ hawohombe nkalola le Hɛrɔdɛ. Lam’akeye Hɛrɔdɛ dia vɔ hawokalodi, nde akomala. Lam’ele nde kokoka ntana Yeso, nde akadjanga dia vɔ ndjaka  ana w’apami tshɛ waki lo lɔlɔnga la Yeso la Bɛtɛlɛhɛma. Koko Yeso aki lo ekokelo, etale l’Edjibito.

L’edjedja ka wonya, Hɛrɔdɛ akayovɔ. Jehowa akatɛ Yɔsɛfu ate: ‘Aya dimɛna dia nyu nkalola.’ Yɔsɛfu, Mariya ndo Yeso wakakalola l’Isariyɛlɛ ndo vɔ wakatodjasɛ lo osomba wa Nazarɛtɛ.