Ja bʼa slujmal Israel, ja bʼa lado wa x-elkʼen ja kʼaʼuji, ja swinkili wa skʼuʼane bʼa wa xbʼobʼ tojuke yuja kʼanalik. Bʼa jun akwal, jujuntik winik ti sbʼaje bʼa Oriente yilawe ja bʼa satkʼinal jastal jun kʼanal xlijpixta sok wan bʼejyel, sok snochowe. Sok ijiye man Jerusalén yuja «kʼanali». Ja winike it wanexta sjobʼjelyi ja ixuk winiki: «¿Bʼa wa xtax ja yal kerem oj och mandaranum sbʼaja judíoʼiki? Wa xkʼana oj kokotikon sbʼaj mekʼan».

Ja Herodes, mandaranum bʼa Jerusalén, yabʼ sbʼaja ajkʼach mandaranum jaw. Jelni chamskʼujol sok sjobʼoyi ja olomalik sacerdote: «¿Bʼa oj pojkuk ja mandaranum jaw?». Ja yeʼnle sjakʼawe: «Ja alumaniki yaluneje ti oj pojkuk bʼa Belén». Ja yuj ja Herodes sjeka spayjel ja winike bʼa Oriente sok yala yabʼ: «Kaʼaxik ja bʼa Belén sok leʼawik ja yal keremi. Yajni xa taʼawexi, ti xjaka walex kabʼa, yujni ja keʼn wa xkʼana koʼel mekʼan sbʼaj». Pe ja jaw mini meranuka.

Ja «kʼanali» cha kʼe bʼejyuk, jaxa winikeʼi snochowe man Belén. Anto ja «kʼanali» ti kan tekʼan bʼa spunto jun naʼits sok ja winike ochye man yoj naʼits. Ti staʼawe ja Jesús lajan soka snani, ja María. Ti koʼye sbʼaj mekʼan ja yal keremi sok yaweyi majtanalik: jastal oro, pom sok perjume. Pe ¿meran maʼ ja jekjiye yuja Jyoba bʼa slejel ja Jesús? Miyuk.

Ja akwal jaw, ja Jyoba yala yabʼ ja José bʼa jun swayich: «Ja Herodes wa skʼana oj smil ja Jesús. Aʼeluk ja il jawa cheʼumi soka wa keremi, sok kaxik man Egipto. Ti la kanyex tiw sok mok kumxanik masanto xkala wabʼyex mixa xiwelaʼuk sbʼaj». Jaxa José soka spamilya wegoxta wajye man Egipto.

Chomajkil, ja Jyoba yala yabʼ ja winike mokxa kumxuke ja bʼay ja Herodes. Yajni ja Herodes snaʼa kʼinal mixa oj kumxuke, jel tajki. Yuja mi staʼa lejel ja Jesús, sjeka smiljel spetsanil ja yal  keremtik bʼa Belén bʼa junxta sjabʼile jastal ja Jesús. Pe ja Jesús mini jas ekʼ sbʼaj yujni tey man Egipto.

Ekʼ ja tyempo, cham ja Herodes. Anto ja Jyoba yalyabʼ ja José: «Mixa xiwelaʼuk sbʼaj. Ojxa bʼobʼ kumxanik». Ja José, ja María soka Jesús kumxiye man Israel sok ti kanye bʼa chonabʼ Nazaret.