Xwi akgtum kachikin kxʼeste Israel niku xlakpuwankan pi staku tlan xpulalinankgo. Akgtum tsisni, makgapitsi lakchixkuwin xalak Oriente akxilhkgolh kʼakgapun akgtum “staku” nema xtatsuwi chu stalanikgolh. Staku kapulalilh asta kJerusalén. Uma lakchixkuwin xkgalhskininamakgo: “¿Niku wi aktsu kgawasa tiku xmapakgsinakan judíos nalitaxtu? Kmaxkiputunaw kakni”.

Herodes, xmapakgsina Jerusalén kgaxmatli uma tamakatsin xlakata xasasti mapakgsina. Lu lilakgaputsalh chu kakgalhskilh xanapuxkun sacerdotes: “¿Niku xʼama lakachin uma mapakgsina?”. Xlakan kgalhtikgolh: “Palakachuwinanin wankgolh pi xʼama lakachin kBelén”. Wa xlakata, Herodes katasanilh lakchixkuwin xalak Oriente chu kawanilh: “Kapitit kBelén chu kaputsatit aktsu kgawasa. Alistalh, nataspitatit chu nakilawaniyaw niku wi xlakata na kamputun kmaxki kakni”. Pero ni xlikana xwanit.

“Staku” tsukupa tatsuwi chu lakchixkuwin stalanikgolh asta kBelén, chu tachokgolh xʼakgstin akgtum chiki chu lakchixkuwin tanukgolh chu tekgskgolh Jesús chu xtse. Tsukukgolh maxkikgo kakni aktsu kgawasa chu maxkikgolh tamaskiwin: oro, incienso chu mirra. Pero ¿xlikana wa Jehová xkamalakgachanit uma lakchixkuwin niku xwi Jesús? Ni.

Uma tsisni, Jehová wanilh José kʼakgtum tamanixni: “Herodes makgniputun Jesús. Kakatataxtu mimpuskat chu minkgawasa chu katsalatit kʼEgipto. Anta katamakgxtakgtit chu ni nataspitatit asta akxni nakkawaniyan pi nialh kalipekua wi milatamatkan”. Wa xlakata, José chu xfamilia lakapala ankgolh kʼEgipto.

Jehová na kawanilh lakchixkuwin xalak Oriente pi nialh xtaspitkgolh niku xwi Herodes. Akxni Herodes katsilh pi nialh xʼamakgo taspitkgo, lu sitsilh. Chu komo nila tekgsli Jesús, mamakgnininalh laktsu lakgkgawasan xalak Belén tiku xkgalhikgo xkata Jesús. Pero Jesús nitu akgspulalh xlakata makgat xwi kʼEgipto.

 Titaxtulh kilhtamaku, Herodes nilh. Wa xlakata Jehová wanilh José: “Nialh kalipekua wi milatamatkan. Tlan nataspitatit”. José, María chu Jesús taspitkgolh kʼIsrael chu tsukukgolh latamakgo kNazaret.