Long wanpela ples long hap is bilong Israel, i gat ol man i bilip olsem ol sta inap stiaim ol. Wanpela nait, sampela man long Is i lukim samting i luk olsem braitpela sta i muv long skai, na ol i bihainim. Dispela sta i kisim ol i go long Jerusalem. Ol dispela man i stat long askim ol man: ‘Dispela pikinini husat bai kamap king bilong ol Juda i stap we? Mipela i kam long brukim skru long em.’

Taim Herot, king bilong Jerusalem, i harim tok long nupela king, em i bel hevi tru. Em i askim ol bikpris: ‘Dispela king i mas bon long wanem hap?’ Ol i tokim em: ‘Ol profet i tok em bai bon long Betlehem.’ So Herot i singautim ol man i kam long Is na tok: ‘Go long Betlehem na painim dispela pikinini. Kam bek na tokim mi em i stap long wanem hap. Mi tu laik brukim skru long em.’ Tasol dispela em tok giaman.

Dispela sta i kirap gen long muv. Ol dispela man i bihainim i go long Betlehem. Sta i stop antap long wanpela haus na ol i go insait. Ol i lukim Jisas wantaim mama bilong em, Maria. Na ol i brukim skru long pikinini na givim ol presen olsem gol, frenkinsens, na mer. Tru Tru Jehova i salim ol dispela man i go bilong painim Jisas? Nogat.

Long dispela nait, long driman Jehova i tokim Josep: ‘Herot i laik kilim i dai Jisas. Kisim meri na pikinini bilong yu na ranawe i go long Isip. Stap long dispela hap inap long taim mi tokim yu olsem em i seif long go bek.’ Kwiktaim, Josep na famili bilong em i go long Isip.

Jehova i bin tokim ol dispela man bilong Is long no ken go bek long Herot. Taim Herot i luksave olsem ol i no kam bek, em i belhat tru. Em i no inap painim Jisas, so em i givim oda long ol i mas kilim i dai olgeta liklik bois long Betlehem husat i gat wankain krismas olsem Jisas. Tasol Jisas i seif, em i stap longwe long Isip.

 Bihain, Herot i dai. Jehova i tokim Josep: ‘Nau em seif long yu go bek.’ Josep, Maria, na Jisas i go bek long Israel, na ol i wokim haus bilong ol long taun Nasaret.