Abantu abaikaraga omu bicweka bya buruga izooba bwa Isareri baikirizaga ngu enyunyuzi nizisobora kubebembera. Kiro kimu, abasaija ba Buruga Izooba bakarora enyunyuzi ey’ekaba n’eyaka muno bacwamu kugihondera. “Enyunyuzi” enu ekabebembera yabatwara Yerusalemu. Obu bahikireyo bakatandika kukaguza abantu bati: ‘Omwana arukugenda kufooka mukama wa Bayudaaya, alinkaha? Nitugonza kumwinamira.’

Herode, omukama wa Yerusalemu, obuyahuliire ha kuzaarwa kw’omukama omuhyaka, akeralikirra muno. Akakaguza banyakatagara abakuru ati: ‘Ninkaha nambere omukama onu asemeriire kuzarwa?’ Bakamugambira bati: ‘Banabbi bakaranga ngu yakuzaliirwe omu Beterehemu.’ Omukama Herode aketa abasaija abarugire buruga izooba hanyuma yabagambira ati: ‘Mugende Beterehemu muserre omwana ogu. Hanyuma mugaruke mungambire nambere ali. Nanyowe ningonza kumwinamira.’ Baitu akaba nabiiha ebisuba.

Hanyuma “enyunyuzi” ekongera yatandika kugenda kandi abasaija nabo bagihondera kuhikira kimu Beterehemu. Ekemerra ha iguru y’enju kandi abasaija batahamu. Bakasanga Yesu ali na nyina, Malyamu. Bakainamira Yesu kandi bamuha ezaabu, obubbani, hamu n’emigaju. Baitu mali Yahwe nuwe akaba atumire abasaija banu kuserra Yesu? Nangwa.

Kiro eki kyonyini, Yahwe akagambira Yusufu omu kirooto ati: ‘Herode n’agonza kwita Yesu. Mukazi wawe n’omwana batwale Misiri. Kandi oikaleyo kuhikya obu ndakugambira kugaruka.’ Aho n’aho, Yusufu atwara mukazi we n’omwana we omu ihanga lya Misiri.

Yahwe akagambira abasaija ba Buruga Izooba batagaruka owa Herode. Herode obuyakyetegeriize ngu abasaija banu tibakugaruka, akabiihirwa muno. Nk’oku akaba atarukusobora kuzoora Yesu, akaragira ngu abaana aboojo ab’omu Beterehemu abaali omu myaka ya Yesu boona baitwe. Baitu, Yesu uwe akaba ali kurungi habwokuba akaba atwairwe ira Misiri.

Akasumi kakahika, Herode yafa. Hanyuma, Yahwe akagambira Yusufu ati: ‘Hati, n’osobora kugaruka  Yerusalemu habwokuba hali kurungi.’ Yusufu, Malyamu, hamu na Yesu bakakwata omuhanda bagaruka Isareri, kandi baikara omu rubuga orwa Nazaresi.