Израильдиң чөөн чүгүнде турар бир чуртка сылдыстар чуртталганы удуртуп-башкарар деп чүүлге бүзүрээр улус чурттап чораан. Олар бир дүне дээрге чырык сылдыска дөмей бир-ле чүүл көрүп кааш, ону эдерип чорупкан. Ол «сылдыс» оларны Иерусалимге эккелген. Олар тус черниң чурттакчыларындан айтырган: «Иудеяның хааны боор төл кайда? Бис аңаа мөгейиксеп тур бис».

Иерусалимниң чагырыкчызы Ирод чаа хаан дугайында дыңнап кааш, аажок коргуп, өргээниң дээди бараалгакчыларындан айтырган: «Ол хаан каяа төрүттүнер турган?» Олар аңаа: «Медээчилер ону Вифлеемге төрүттүнер дээн» — деп харыылаан. Ирод Чөөн чүктен демги улусту кыйгыргаш, мынча дээн: «Вифлеемче баргаш, ол төлдү дилеп көрүңер. Оон меңээ келгеш, ооң кайдазын чугаалаңар. Мен база аңаа мөгейиксеп тур мен». Херек кырында Ирод оларны мегелепкен.

Демги «сылдыс» ол улусту Вифлеемде бир бажыңче эккелген. Ында Иисус биле ооң авазы Мария бар болган. Олар төлге мөгейгеш, аңаа алдынны, ладанны, мирраны белекке берген. Ол улусту Иисусче кым эккелген? Иегова бе? Чок.

Ол-ла дүне Иегова Иосифтиң дүжүнге мынча дээн: «Ирод Иисусту өлүрүксеп турар. Кадайың биле оглуңну алгаш, Египетче дезивит. Дедир чаныңар дивээн шаамда, аңаа турар силер». Иосиф доп-дораан өг-бүлези-биле Египетче чорупкан.

Иегова Чөөн чүктен улуска Иродче барбас кылдыр чагаан. Ирод оларны келбес деп билип кааш, аажок хорадаан. Ол Иисусту тып чадааш, Вифлеемде шупту бичии оолдарны өлүрерин дужааган. Ынчалза-даа Иисус ыракта Египетке турган.

 Үе эрткенде, Ирод чок апарган. Иегова Иосифке чугаалаан: «Ам дедир чанып болур силер». Иосиф, Мария база Иисус Израильче эглип келгеш, Назаретке чурттап эгелээн.