Vofeka yimue ya kala kutundilo wo ko Isareli kua kala omanu vamue va tavele okuti olombungululu via ponduile oku va songuila. Vuteke umue, alume vamue va tunda Kutundilo va mola cimue ca kala oku molẽha ndolumbungululu lunina okuti lua kala oku endela kilu kuenje ovo va lu kuama. “Olumbungululu” luaco, lua va songuila ko Yerusalãi. Alume vaco va fetika oku pula omanu vati: ‘Kupi ku kasi omõla una o laika oku kala soma ya va Yudea? Etu tueya kulo oco tu u kekamẽle.’

Eci Herode, soma yo ko Yerusalãi, a yeva eci catiamẽla kosoma yimue yokaliye, wa kuata esakalalo lialua. Eye wa pula kovitunda via velapo hati: ‘Kupi soma yaco a citiwila?’ Ovo vo sapuila vati: ‘Ovaprofeto va popia okuti eye wa ponduile oku citiwila ko Beteleme.’ Omo liaco, Herode wa vilikiya alume va tunda Kutundilo kuenje wa va sapuila hati: ‘Kuendi ko Beteleme ka sandiliyi oñaña yaco. Kuenje tiuki kokuange oco vu ndi sapuiliko oku eye a kasi. Ame ndi yongola oku yi kekamẽlavo.’ Pole, ca kala uhembi.

“Olumbungululu” lua fetika vali oku enda. Alume va kuama “olumbungululu” luaco toke ko Beteleme. “Olumbungululu” lua talama kilu lionjo yimue kuenje alume va iñila vonjo yaco. Ovo va sanga Yesu la inaye Maria. Noke va kekamẽla omõla kuenje va eca kokuaye olombanjaile viulu, onguendu kuenda o mura. Anga hẽ Yehova wa tumile alume vaco oco va sange Yesu? Sio.

Vuteke waco, Yehova wa sapuila Yosefe vonjoi hati: ‘Herode o yongola oku ponda Yesu. Ambata ukãi wove lomõla kuenje tilili Kegito. Oko vu kala toke eci ndu ku sapuili okuti citava oku tiuka.’ Vepuluvi liaco, Yosefe kumue lepata liaye va enda Kegito.

Yehova wa lungula alume va tunda Kutundilo oco ka va ka tiukile ku Herode. Eci Herode a limbuka okuti ovo ka va tiukilile vali kokuaye, wa tema calua. Omo okuti ka ponduile oku sanga Yesu, wa handeleka okuti omãla vosi valume va kuete utunga ndowu wa Yesu ko Beteleme, va pondiwa. Pole, Yesu wa popeliwa poku ambatiwa kofeka yimue ocipãla lo Beteleme okuti, Kegito.

 Vokuenda kuotembo Herode wa fa. Yehova wa sapuila Yosefe hati: ‘Kaliye citava oku tiukila.’ Yosefe la Maria kuenda Yesu va enda vali ko Isareli kuenje va tunga onjo yavo volupale luo Nasara.