Kha shango ḽa vhubvaḓuvha ha Isiraele ho vha hu na vhathu vhe vha vha vha tshi tenda uri ṋaledzi dzi nga vha livhisa. Vhuṅwe vhusiku, vhaṅwe vhanna vha bvaho Vhubvaḓuvha vha vhona zwi no nga ṋaledzi i penyaho i tshi khou tshimbila lutomboni nahone vha i tevhela. “Ṋaledzi” ya vha isa Yerusalema. Vhenevho vhanna vha thoma u vhudzisa vhathu vha ri: ‘Ṅwana ane a ḓo vha khosi ya Vhayuda u ngafhi? Ro ḓa u mu losha.’

Musi Herode, khosi ya Yerusalema, a tshi pfa nga ha khosi ntswa, a vhilaela nga maanḓa. A vhudzisa vhotshifhe vhahulwane a ri: ‘Iyi khosi hu pfi i ḓo bebelwa ngafhi? Vha mu vhudza vha ri: ‘Vhaporofita vho ri u ḓo bebelwa Betlehema.’ Herode a mbo vhidza vhanna vha bvaho Vhubvaḓuvha a vha vhudza a ri: ‘Iyani Betlehema ni wane hoyu ṅwana. Ni vhuye ni mmbudze hune a vha hone. Na nṋe ndi ṱoḓa u mu losha.’ Fhedzi o vha a tshi khou zwifha.

“Ṋaledzi” ya dovha ya tshimbila. Vhenevho vhanna vha i tevhela u swika Betlehema. “Ṋaledzi” ya ima nṱha ha iṅwe nnḓu nahone vhenevho vhanna vha dzhena. Vha wana Yesu e na Maria mme awe. Vha losha ṅwana nahone vha mu fha zwifhiwa zwa musuku, miri ya zwioro na ṋonzhe dza mishonga. Naa ndi Yehova o rumaho avha vhanna uri vha wane Yesu? Hai.

Honoho vhusiku, Yehova a amba na Yosefa muḽoroni a ri: ‘Herode u ṱoḓa u vhulaha Yesu. Dzhiani mufumakadzi waṋu na ṅwana ni shavhele Egipita. Ni dzule henengei u swikela ndi tshi ni vhudza uri ni vhuye.’ Yosefa na muṱa wawe vha ṱavhanya vha ya Egipita.

Yehova o vha o vhudza vhanna vha Vhubvaḓuvha uri vha songo vhuyelela ha Herode. Musi Herode a tshi vhona uri a vha tsha vhuya, a sinyuwa. Samusi a songo tsha wana Yesu, a laya a ri vhatukana vhoṱhe vha murole wa Yesu vha re Betlehema vha vhulahwe. Fhedzi Yesu o vha o tsireledzea, kule-kule kha ḽa Egipita.

 Herode a vhuya a fa. Yehova a amba na Yosefa a ri: ‘Zwino no tsireledzea uri ni nga humela murahu.’ Yosefa, Maria na Yesu vha vhuyelela kha ḽa Isiraele nahone vha dzula muḓini wa Nazareta.