May lugar ha este han Israel nga an mga tawo natoo nga mahimo hira giyahan han mga bitoon. Usa ka gab-i, may pipira nga lalaki tikang ha Este nga nakakita hin sugad hin naglalakat nga malamrag nga bitoon. Ginsundan nira ito. Gin-giyahan hira hito ngadto ha Jerusalem. Nagpakiana hira ha mga tawo: ‘Hain an bata nga magigin hadi han mga Judio? Kinanhi kami basi magyukbo ha iya.’

Han hinbaroan ni Herodes nga hadi han Jerusalem an mahitungod han usa nga bag-o nga hadi, nabaraka gud hiya. Nagpakiana hiya ha punoan nga mga saserdote: ‘Diin matatawo ini nga hadi?’ Hira nagsiring: ‘An mga propeta nagsiring nga matatawo hiya ha Betlehem.’ Salit iginpatawag ni Herodes an kalalakin-an nga tikang ha Este ngan ginsidngan: ‘Kadto kamo ha Betlehem ngan bilnga niyo ini nga bata. Balik kamo nganhi ngan isumat ha akon kon hain hiya. Karuyag ko liwat magyukbo ha iya.’ Pero diri ito tinuod.

Naglakat na liwat an ginhunahuna han kalalakin-an nga usa nga bitoon. Ginsundan nira ito ngadto ha Betlehem. Inundang ito ha igbaw han usa nga balay. Pagsulod nira, nakita nira hi Jesus ngan an iya nanay nga hi Maria. Nagyukbo hira ha bata ngan naghatag hin mga regalo nga bulawan, busag nga insenso, ngan mira. Hi Jehova gud ba an nagsugo ha ira nga bilngon hi Jesus? Diri.

Hito nga gab-i, ginsidngan ni Jehova hi Jose pinaagi ha inop: ‘Gin-iikaparatay ni Herodes hi Jesus. Dad-a an imo asawa ngan an imo anak ngadto ha Ehipto. Didto la anay kamo tubtob nga sidngan ko kamo nga bumalik na.’ Hi Jose ngan an iya pamilya kumadto dayon ha Ehipto.

Ginsidngan ni Jehova an kalalakin-an nga tikang ha Este nga diri bumalik kan Herodes. Han waray hira bumalik, nasina gud hi Herodes. Tungod kay waray niya mabibilngi hi Jesus, nagsugo hiya nga pamatayon an ngatanan nga bata nga lalaki ha Betlehem nga kaedad ni Jesus. Pero waray mameligro hi Jesus kay nakadto na hiya ha Ehipto.

 Paglabay han panahon, namatay hi Herodes. Hi Jehova nagsiring kan Jose: ‘Yana, puydi na kamo bumalik.’ Salit hira Jose, Maria, ngan Jesus binalik ha Israel ngan nag-ukoy ha syudad han Nazaret.