Olo nipetraka tantin̈ianany Israely tan̈y nino fa lakintan̈a mahavita mitariky olo. Taminy alin̈y araiky zay, nisy lakintan̈a nazava be tamy lan̈itry. Niteky raha io, ke nisy iro lelahy baka Antin̈iana zay nan̈araka tany nimboanizio. Nitaritiny “lakintan̈a” io ta Jerosalema iro. Ke lelahy aby io nan̈ontany olo tao: ‘Aia ma tsaiky hanjary panjakany Jiosy zen̈y? Zahay io navy hankohoko aminany.’

Heroda Panjakany Jerosalema koa fa naharen̈y raha momba panjaka vaovao io, izy niasa loha mare. Izy nan̈ontany iro lohandohany pisoron̈o aby io: ‘Farifary aia ma tany hitirahany panjaka zen̈y?’ Ho iro taminany: ‘Paminan̈y aby io nivolan̈a fa a Betlehema zen̈y.’ Nikahiny Heroda iro lelahy baka Antin̈iana aby io, ke hoizy tamindro: ‘Mindao tadiavanaro a Betlehema an̈y tsaiky zen̈y. Ambarà zaho tany misy izy koa fa hitanaro. Zaho koa mba tihankohoko aminany.’ Vandiny fo zen̈y.

Niteky koa “lakintan̈a” in̈y. Loso koa iro lelahy aby io nan̈araka izio ta Betlehema tan̈y. Nijanon̈o tan̈abony tran̈o zay “lakintan̈a” io. Lelahy aby io niditry tamy tran̈o io. Hitandro tao Jesosy ndreky Maria. Iro nankohoko tamy tsaiky io, baka io nan̈amia volamena, emboko mangitry, ndreky miora nataondro kadonany. Jehovah ma nan̈iraka iro hitady Jesosy? Aha, tsy izy.

Alin̈izin̈y Jehovah nampan̈inofy Josefa. Hoizy taminany: ‘Heroda io mila hamono Jesosy. Indesa milefa a Ezipta an̈y vadinao ndreky tsaiky io. Aza miala an̈y anao, koa tsy zaho mivolan̈a aminao mimpodiana.’ Josefa ndreky vadiny ndreky zanany loso ta Ezipta.

Jehovah nivolan̈a tamindro lelahy baka Antin̈iana aby io, fa iro tsy mahazo mimpody aminy Heroda eky. Neloko mare Heroda izikoa fa hainy fa olo aby io tsy nandalo taminany tan̈y. Nirahiny nivonen̈a koa tsaiky lelahy jiaby mbala vo teraka, fotony Jesosy tsy hitany. Jesosy tsy naty, fotony izy efa ta Ezipta.

 Heroda koa fa naty, Jehovah nivolan̈a tamy Josefa: ‘Anaro modia amy zay.’ Nody ta Israely Josefa ndreky Maria, avio Jesosy, ke iro nipetraka ta Nazareta.