Cilambo cine cakungopoko lyuŵa kwa cilambo ca Yisalayeli, ŵandu ŵakulupililaga kuti ndondwa mpaka syalongolele. Lisiku line cilo, acalume ŵane ŵakutyocela kungopoko lyuŵako ŵaciweni cindu cakuwoneka mpela ndondwa jakuŵala mnope cacajendaga mwinani. Kaneko ŵatandite kucikuya. Ndondwajo jalongolele jemanjajo ku Yelusalemu. Kaneko acalumeŵa ŵatandite kwawusya ŵandu kuti, ‘Ana juli kwapi mwanace jucaciŵa mwenye jwa Ayuda? M’weji tuyice kuti tumtindiŵalile.’

Helodi mwenye jwa ku Yelusalemu ali apikene yakwamba mwenye jwasambanoju, yampwetece mnope. Jwalakwe ŵawusisye acakulungwa ŵambopesi kuti, ‘Ana mwenye jwasambanoju jwasosekwaga kupagwila kwapi?’ Jemanjaji ŵajanjile kuti, ‘Ŵakulocesya ŵasasile kuti jwalakwe cacipagwila ku Betelehemu.’ Sambano Helodi ŵaŵilasisye acalume ŵaŵatyocele kungopoko lyuŵa ni ŵasalile kuti, ‘Mjawule ku Betelehemu, pacimkamsimane mwanacejo, m’yice musalile kwajuli. Unesoni ngusaka ngamtindiŵalile.’ Nambo welewu waliji unami.

Kaneko ndondwa jila jatandite kwendasoni. Acalume ŵala ŵajikuyiye mpaka ku Betelehemu. Kaneko ndondwa jila jajimi penani pa nyumba, ni acalumewo ŵajinjile m’nyumbamo. Jemanjaji ŵamsimene Yesu ali ni mamagwe. Acalumeŵa ŵamtindiŵalile mwanacejo ni ŵampele mituka ja golidi, ubani, soni mawuta gakununjila ga mule. Nambo ana yisyene kuti Yehofa ni juŵatumisye acalumeŵa kuti akamlole Yesu? Iyayi.

Cilo cicoco, Yehofa ŵamsalile Yosefe kupitila mu sagamisi kuti, ‘Helodi akusaka kum’wulaga Yesu. Mwajigale ŵamkwenu soni mwanacejo ni mtilile ku Iguputo. Mkatame kweleko mpaka pacinjimsalila kuti m’wujile.’ Ndaŵi jijojo Yosefe ni liŵasa lyakwe ŵapite ku Iguputo.

Yehofa ŵasalile acalume ŵaŵatyocele kungopoko lyuŵa ŵala kuti akawujila kwa Helodi. Kaneko Helodi ali ayiweni kuti jemanjaji ngakuwuja, jwatumbile mnope. Jwalakwe paŵalepele kumpata Yesu, ŵalamwile kuti ŵanace wosope ŵamisingu jakulandana ni Yesu mu Betelehemu, awulajidwe. Nambo Yesu jwakulupwice ligongo lyakutilila ku Iguputo.

 Pali papite ndaŵi Helodi ŵawile. Yehofa ŵamsalile Yosefe kuti, ‘Sambano jili ndaŵi jambone jakuti m’wujile.’ Yosefe, Maliya soni Yesu ŵawujile ku Yisalayeli. Sambano jemanjaji ŵatamilicice mu msinda wa Nasaleti.