Tu lakʼinil Israeleʼ yaan kaʼach junpʼéel luʼumil tuʼux le máakoʼoboʼ ku creertikoʼob ku nuʼuktaʼaloʼob tumen le estrellaʼoboʼ. Junpʼéel áakʼabeʼ jujuntúul máakoʼob Lakʼin u taaloʼobeʼ tu yiloʼob yaan baʼax ku juul bey junpʼéel estrella teʼ kaʼanoʼ. Le «estrellaaʼ» ku péek kaʼachi le oʼolal binoʼob tu paach tak ka kʼuchoʼob tu kaajil Jerusalén. Le máakoʼobaʼ táan kaʼach u bin u kʼáatkoʼob tiʼ u maasil: ‹¿Tuʼux yaan u rey le judíoʼob tsʼoʼok u síijiloʼ? K-kʼáat chintal tu táan›.

Herodes, u reyil Jerusaleneʼ, tu yuʼubaj u yúuchul tʼaan yoʼolal le túumben reyoʼ. Letiʼeʼ jach chiʼichnakchaji ka tu kʼáataj tiʼ u nuuktakil le sacerdoteʼoboʼ: ‹¿Tuʼux aʼalaʼan kun síijil le túumben reyoʼ?›. Letiʼobeʼ tu núukoʼob: ‹Le profetaʼoboʼ tu yaʼaloʼob yaan u síijil tu kaajil Belén›. Herodes túuneʼ tu túuxtaj tʼanbil le máaxoʼob Lakʼin u taaloʼoboʼ ka tu yaʼalajtiʼob: ‹Xeeneʼex Belén a kaxteʼex le chan xiʼipaloʼ. Ken tsʼoʼokkeʼ suuneneʼex a waʼaleʼexten utiaʼal ka xiʼiken xan chintal tu táan›. Chéen baʼaleʼ táan u tuus kaʼachi.

Le «estrellaoʼ» joʼopʼ u péek tu kaʼatéen, le máakoʼoboʼ binoʼob tu paach tak ka kʼuchoʼob Belén. Le «estrellaoʼ» waʼalaj yóokʼol junpʼéel naj, le máakoʼoboʼ ookoʼobeʼ ka tu yiloʼob Jesús yéetel María, u maama. Letiʼobeʼ chinlajoʼob tu táan le chan xiʼipaloʼ yéetel tu síiʼob tiʼ oro, incienso yéetel mirra. Chéen baʼaleʼ, ¿jach wa tu jaajil Jéeoba túuxt le máakoʼob yiknal Jesusoʼ? Maʼatech.

Teʼ áakʼab jeʼeloʼ ichil junpʼéel wayakʼeʼ Jéeobaeʼ tu yaʼalaj tiʼ José: ‹Herodeseʼ taak u kíimsik Jesús. Chʼaʼ le chan xiʼipal yéetel u maamaoʼ, ka púutsʼkeʼex tu luʼumil Egipto, tiʼ ka pʼáatkeʼex tak ken in waʼalteʼex jeʼel u páajtal a lukʼleʼexeʼ›. Bey túunoʼ José yéetel u familiaeʼ tu séebaʼanil binoʼob Egipto.

Jéeoba xaneʼ tu yaʼalaj tiʼ le máakoʼob Lakʼin u taaloʼoboʼ maʼ u suutoʼob tu yiknal Herodes. Ka tu yilaj Herodes maʼ suunajoʼobeʼ, jach pʼuʼuji. Tsoʼoleʼ tumen maʼ páajchaj u yojéeltik tuʼux yaan Jesuseʼ, tu túuxtaj kíimsbil tuláakal le mejen xiʼipaloʼob igual u edadoʼob yéetel Jesús yanoʼob tu kaajil Belenoʼ. Chéen baʼaleʼ tiʼ Jesuseʼ maʼ úuch mix baʼaliʼ tumen tiaʼan kaʼach tu luʼumil Egiptoeʼ.

 Ka máan kʼiineʼ, kíim Herodes. Jéeoba túuneʼ tu yaʼalaj tiʼ José: ‹Jeʼel u páajtal a suuteʼexeʼ, tsʼoʼok u kíimil le máax taak kaʼach u kíimsik le chan xiʼipaloʼ›. José, María yéetel Jesuseʼ suunajoʼob tu luʼumil Israel yéetel pʼáatoʼob kajtal tu kaajil Nazaret.