Agu aboro naaraka Yisaraere yo ku uroyo anaaberãha nga akerekuru rengbe arengba ka yugopai fuyo. Rogo kura yuru sa, kura akumba naaraka Uroyo abi he wa gu kerekuru ninaakura wiso nga tungu ariyo, na i ki tona ka pekafuo ru. Gu “kerekuru” re andu na yo ku Yerusarema yo. Agu akumba re atona ka sasana aboro nga: ‘Wari du du gu gude ni nika ngia bakindo aYudo? Ani ye ka tumusa fuko.’

Ho Erode nangia bakindo Yerusarema agihe ni nga i batika vovo bakindo, ko atona ka bakabangiriko. Ko asana agbiamotumo nga: ‘Wari du si adu ni nga i nika batika bakindo?’ I ki ya fuko: ‘Anebi aya i nika batikako Betereme yo.’ Sidu, Erode ki yambu agu akumba naaye Uroyo ki ya fuyo: ‘Oni ndu ku Betereme ka bi gu gude re. Oni ki karaga tironi ka ye ka pepa gu ba du ko rogoho fere. Mi naida ka ndu ka tumusa fuko a.’ Ono ziree du nangia gupai re.

Gu “kerekuru” re atona ka ngbembatayo berewe fuyo. Agu akumba re ki pekefuo ru ku Betereme yo. Gu “kerekuru” re aye ki ru barii bambu sa na agu akumba re ki rimi koyo. I agbia Yesu na nako nangia Maria. I atumusa fu gu gude re na ki fuku agamahe fuko nga dahabu, na wene afuõngua. Ya mo Yekova du naakedi agi akumba re i ndu ka bi Yesu? Oó.

Rogo gu yuru re, Yekova aya fu Yosefa rogo musumo wẽ: ‘Erode naida ka imo Yesu. Mo di diaro na gude ki oro ku Ezipeta yo. Mo raki yo daho mi nika ya ni foro apai ma ngba mo karagatiro.’ Nibasa, Yosefa na gako aborokporo andu ku Ezipeta yo.

Yekova aya fu agu akumba naaye Uroyo ka i ndunga fuo Erode ya ho i nikaa karagatiyo ni. Ho Erode abihe ni nga agu akumba re ayengo te, ngbaduko aimi ni kerehe. Wa gene aadunga beko tipa ka gbia Yesu ya, ko azinahe nga gu rukutu agude dunduko garãyo adu wa  ga Yesu i imi yo kusayo. Ono Yesu adu ni bandabanda ko, tuturũ Ezipeta yo.

Fuo bete aregbo kusa, Erode akpi. Yekova ki ya fu Yosefa: ‘Awere apai ima ngba, mo karagatiro.’ Yosefa, Maria na Yesu akaragatiyo ku Yisaraere yo, na i ki dua kporo rogo gu gbata nga Nazareta ka raka yo.