Joseph ba Marie be mbe be nyiñe’e Nazareth a Yésus, a bobenyañe bé bevok. Joseph a mbe a toñe nda bôte jé a ésaé kafinda, a mbe a ye’ele’ fe je Metiñe me Yéhôva. Be mbe be kele’e kañe Yéhôva e synagogue, be mbe fe be kele’e Jérusalem éyoñ jia mbu asu Pâque.

Éyoñ Yésus a nga bi mimbu 12, nda bôte jé é nga ke Jérusalem; dulu ete e mbe ayap. Tison é mbe njalan a bôt be nga zu abô’ô Pâque. Éyoñ abô’ô e maneya, Joseph ba Marie be nga bulan, be mbe be buni’i na ba be Yésus be ne nsamba. Ve éyoñ be nga jeñe nye, be nji yene nye vôm éziñ.

Ane be nga beta bulane Jérusalem; be nga bo melu melal be jeñe’e nye. Éyoñ be nga ke kui temple, be nga koone nye a too si zañe beye’ele, a kôme’e vô’ôlô be, a sili’i fe be benya minsili. Bôte bete be nga kame fe’e Yésus, ane be’e fe be nga  taté na ba sili nye minsili. Be mbe be kame’e biyalane bié. Be nga yeme na a kôme wô’ô Metiñe me Yéhôva.

Joseph ba Marie be nga ko mbia woñ. Ane Marie a nga jô na: ‘A mone wom, abime njeñan bi jeñeya wo! Wo be vé?’ Yésus ke na: ‘Ye mi nji yeme na ma yiane tabe nda Ésa wom?’

Ane Yésus a nga bulane Nazareth a bebiaé bé. Joseph a nga ye’ele nye ésaé kafinda. Wo simesane na Yésus a mbe avale mongô avé? Yésus a mbe mongô a ne fek; nté a mbe a yaék, a mbe a yené’é mvaé mise me Zambe a mise me bôt.