Zozef ek Mari ti reste Nazaret ansanm avek Zezi ek zot bann garson ek fiy. Zozef ti pran swen avek son fanmir par travay konman en sarpantye e i ti ansenny zot lo Zeova ek son Lalwa. Zozef ek son fanmir ti al regilyerman dan sinagog pour ador Zeova e tou le lannen, zot ti al Zerizalenm pour Lapak.

Ler Zezi ti annan 12 an, parey labitid, son fanmir ti fer sa gran vwayaz pour al Zerizalenm. Lavil ti plen avek dimoun ki ti’n vin selebre Lapak. Apre sa, Zozef ek Mari ti rekonmans zot vwayaz pour retourn kot zot, an krwayan ki Zezi ti ansanm avek zot. Me ler zot ti rod li partou parmi zot fanmir, zot pa ti vwar li.

Zot ti retourn Zerizalenm e pandan trwa zour, zot ti rod Zezi. Finalman, zot ti al kot tanp. Laba zot ti vwar Zezi pe asize avek bann ansenyan. Zezi ti pe ekout zot atantivman e demann bann bon kestyon. Bann ansenyan ti sitan enpresyonnen par  Zezi ki zot ti konmans demann li kestyon. Zot ti etonnen par son bann larepons. Zot ti vwar ki Zezi ti konpran byen Lalwa Zeova.

Zozef ek Mari ti pe vreman trakase. Mari ti dir: ‘Mon garson, nou ti pe rod ou partou. Kot ou ti ete?’ Zezi ti dir: ‘Pa zot konnen ki mon bezwen dan lakaz mon Papa?’

Zezi ti retourn Nazaret avek son paran. Zozef ti montre Zezi konman pour fer travay sarpantye. Ki kalite dimoun ou krwar Zezi ti ete ler i ti ankor zenn? Anmezir i ti grandi, Zezi ti vin deplizanpli saz e i ti kontinyelman fer plezir Bondye ek zonm.