Yusufu ni Mariyamu ni Yesu ani u dencɛw n’u denmuso tɔɔw tun siginin be Nazarɛti. Yusufu tun be miniziye baara lo kɛ k’a ka denbaya balo ani a tun b’u kalan Jehova n’a ka sariya koo la. U tun be to ka taga batoso kɔnɔ ani saan o saan, u tun be taga Tɛmɛnkan seli kɛ Zeruzalɛmu.

Yezu saan 12nan na, a somɔgɔw ye tagamajan kɛ fɔɔ Zeruzalɛmu i ko u tun be deli k’a kɛ cogo min na. Dugu tun fanin lo jama na. U tun nana Tɛmɛnkan seli lo kɛyɔrɔ. Tɛmɛnkan seli kɔ, Yusufu ni Mariyamu ye sira minɛ walisa ka kɔsegi u ka dugu la. U tun b’a miiri ko Yesu be n’u ye mɔgɔw cɛma. Nka tuma min na u y’a yɔrɔ ɲini u balimaw n’u lɔnbagaw cɛma, u m’a ye.

U kɔsegira Zeruzalɛmu ka tile saba kɛ n’u b’u dencɛ yɔrɔ ɲinina. A laban, u tagara Alabatosoba kɔnɔ. Yezu siginin tun be yen karamɔgɔw cɛma n’a be ɲiningali ɲumanw kɛra ani k’u  lamɛn. Yezu ye karamɔgɔw kabakoya fɔɔ u y’a daminɛ ka ɲiningaliw kɛ a ye. A ka jaabiliw y’u kabakoya. U y’a ye ko Yezu be Jehova ka sariya lɔn.

Yusufu ni Mariyamu hakili ɲagamina kosɔbɛ. Mariyamu ko: ‘N’ deen, an y’i yaala yɔrɔ bɛɛ! I tun be min?’ Yezu y’u jaabi ko: ‘Aw tun m’a lɔn ko ne ka kan ka sɔrɔ n Faa ka soo kɔnɔ wa?’

Yezu tugura a bangebagaw kɔ ka taga Nazarɛti. Yusufu ye Yezu degi miniziye baara la. E ka miiri la, Yezu tun ye mɔgɔ sifa juman lo ye a denmisɛn tuma na? A bonyatɔ, dɔ tora ka fara a ka hakilitigiya kan ani a koo diyara Ala ni mɔgɔw ye.