E vakaitikotiko e Nasareci o Josefa, Meri, Jisu kei na vica tale na luvedrau tagane kei na yalewa. E cakacaka vakamatai o Josefa me qarava nona vuvale, e vakavulici ratou tale ga ena ka me baleti Jiova kei na nona Lawa. Ratou lai sokalou wasoma ina valenilotu, ratou lako e veiyabaki i Jerusalemi ena Lakosivia.

Ni yabaki 12 o Jisu, eratou lako vakavuvale i Jerusalemi me vaka ga eratou dau cakava. Era osota na koro o ira na mai soqova na Lakosivia. Oti na soqo, rau lesu tale o Josefa kei Meri, rau nanuma ni tomani ira tiko mai na kena vo o Jisu. Ia ni rau vaqarai koya vei ira na wekadrau, e yali.

Rau mani lesu i Jerusalemi, rau vaqarai luvedrau tiko me tolu na siga. Oti rau lako sara ina valenisoro. Rau raici Jisu ni dabe tiko ena kedra maliwa na qasenivuli, e vakarogoci ira vinaka, e tarogi ira tale ga ena taro veiganiti. Era qoroqoro na qasenivuli  ra qai tarogi Jisu. Era kurabuitaka nona sauma na taro. Era raica ni kila vinaka na Lawa i Jiova.

Erau lomaleqa vakalevu o Josefa kei Meri. E kaya o Meri: ‘Luvequ, keirau sa oca na vaqarai iko! O tu mai vei?’ E kaya o Jisu: ‘Drau sega ni kila ni dodonu meu tiko ena vale i Tamaqu?’

Sa qai lesu vata kei rau nona itubutubu o Jisu i Nasareci. E vakavulici koya o Josefa ena cakacaka vakamatai. E vakacava na itovo i Jisu ni se cauravou lailai? Ni tubu cake tiko, e levu na nona vuku, e taleitaki koya tale ga na Kalou kei ira na tamata.