De Joseph und d Maria wohned mit Jesus und ihrne andere Chind z Nazareth. De Joseph kümmeret sich guet um sini Familie. Er schaffet als Zimmermaa und hilft sinere Familie, Jehova kennezlerne und sis Gsetz z halte. Di ganzi Familie versammlet sich regelmässig amene Ort, wo Synagoge heisst, und betet dört Jehova a. Si göhnd au jedes Jahr uf Jerusalem und fiired dört s Passahfescht.

Jesus isch jetzt 12i, und eso wie jedes Jahr macht sich di ganzi Familie uf de wiit Weg uf Jerusalem. D Stadt isch voll mit Lüt, wo alli cho sind, zum s Passah z fiire. Nachdem s Fescht fertig isch, mached sich de Joseph und d Maria wider uf de Heiweg. Si meined, Jesus isch bi de Verwandte und Fründe, wo mit ihne mitreised. Aber wo si ihn dört sueched, finded si ihn eifach niene.

Sofort göhnd si zrugg uf Jerusalem und sueched ihre Bueb ganzi drü Täg lang. Schlussendlich göhnd si i Tempel und finded Jesus dört. Er sitzt i de Mitti vo de Lehrer, lost ihne guet zue und stellt intressanti Frage. D Lehrer sind sehr beiidruckt vo Jesus und fanged denn au a, ihm Frage z stelle. Si stuuned nume eso über sini Antworte und merked, dass er s Gsetz vo Jehova würklich guet verstaht.

De Joseph und d Maria sind fascht verzwiiflet. D Maria seit: «Chind, mir hend dich überall gsuecht! Wo bisch au gsi?» Jesus git zur Antwort: «Hend ihr nid gwüsst, dass ich da im Huus vo mim Vater muess sii?»

Jesus gaht mit sine Eltere zrugg uf Nazareth und lernt dört vom Joseph de Bruef als Zimmermaa. Was denksch du, wie isch Jesus so als junge Mensch? Je älter Jesus wird, umso grösser wird sini Wiisheit, und Jehova und d Mensche hend ihn immer lieber.