José ha María oiko vaʼekue Nazarétpe ha upépe haʼekuéra omongakuaa Jesúspe ha umi ótro ifamíliape. José ombaʼapo vaʼekue karpinteríape omantene hag̃ua hembireko ha ifamiliakuérape. Haʼe omboʼe vaʼekue chupekuéra Ñandejára Léi ha hetave mbaʼe porã Jehovágui. Haʼekuéra ojepokuaa vaʼekue oho pe sinagógape oadora hag̃ua Ñandejárape. Káda áño avei oho hikuái Jerusalénpe ofesteha hag̃ua pe Páskua.

Jesús orekórõ guare 12 áño oho ihentekuéra ndive Jerusalénpe ojapoháicha jepi voi hikuái káda áño. Pe siudápe henyhẽte umi hénte ohóva ofesteha hag̃ua pe Páskua. Opa rire pe fiésta, José ha María oviaha jeýma oho hag̃ua hógape. Haʼekuéra oimoʼã kuri Jesús ouha hendivekuéra upe grúpope umi ihentekuéra apytépe. Upéinte oheka hikuái Jesúspe, péro ndotopái chupe.

Upémarõ oho jey hikuái Jerusalénpe ha tres díare oheka hikuái Jesúspe opárupi. Upéi hasýpe otopa chupe hikuái pe témplope oguapy hína umi mboʼehára mbytépe, ohendu chupekuéra ha oporandu chupekuéra heta mbaʼére. Umi mboʼehárape osorprende opa mbaʼe Jesús heʼíva ha oñepyrũ  oporandu chupe hikuái heta mbaʼe. Haʼekuéra oponderaiterei mbaʼéichapa Jesús orresponde chupekuéra umi pregúnta. Ohechakuaa hikuái Jesús ontende porãitereiha Jehová Léi.

José ha María ojepyʼapyeterei kuri Jesús rehe. Upévare otopávo hese hikuái, María heʼi chupe: “Che memby, nde túa ha che ningo hetaitereíma roheka roikóvo. ¿Moõiko reime hína raʼe?”. Jesús heʼi chupekuéra: “¿Ndapeikuaái piko aime vaʼerãha che Túa rógape?”.

Jesús oho jey itúa ha isýndi Nazarétpe. Upépe José omboʼe Jesúspe ombaʼapo hag̃ua karpinteríape. ¿Mbaʼépa nde ere? ¿Mbaʼéichapa oiméne rakaʼe Jesús umi edápe? Jesús okakuaa vaʼekue ohóvo ha amasdía iñaranduve. Upévare Ñandejára ha umi hénte káda día ohayhuve vaʼekue chupe.