Josep enggau Maria diau ba Nasaret enggau Jesus sereta anak seduai iya ke bukai. Josep ngintu ruang bilik iya enggau bekereja nyadi seiku tukang kayu lalu ngajar sida pasal Jehovah sereta Adat Iya. Sida sebilik ngagai rumah sembiang enggau tetap ngambika ulih nyembah Jehovah lalu bejalai ngagai Jerusalem kena ngintu pengerami Paska ninting taun.

Lebuh Jesus beumur 12 taun, sida sebilik bejalai jauh ngagai Jerusalem baka ke selama. Kuta nya penuh enggau orang ke sama datai ngintu pengerami Paska. Pengudah nya, Josep enggau Maria berengkah mupuk pulai. Seduai iya ngumbai Jesus bisi enggau raban ke pulai enggau sida. Tang, lebuh seduai begigaka iya ba raban nya, seduai enda tetemuka iya.

Seduai iya nikal baru ngagai Jerusalem, begigaka Jesus pengelama tiga hari. Pengujung iya, seduai ngagai rumah sembiang. Dia seduai tetemuka Jesus duduk ba entara bala pengajar, mending enggau manah sereta betanyaka utai. Bala  pengajar amat alit ati enggau Jesus nyentukka sida berengkah nanya iya enggau mayuh tanya. Sida mega alit ati enggau saut iya. Sida ulih meda iya amat meretika Adat Jehovah.

Josep enggau Maria amat irau ati. Ku Maria: ‘Anak, kami udah irau ati begigaka nuan! Kini nuan?’ Jesus nyaut: ‘Kati seduai enda nemu aku enda tau enda ba rumah Apai aku?’

Jesus mupuk pulai enggau apai indai iya ngagai Nasaret. Josep ngajar Jesus ngereja pengawa nyadi tukang kayu. Ba runding nuan, Jesus nembiak ke baka ni? Lebuh iya mansang besai, Jesus majak bepenemu-dalam lalu dikerinduka Petara enggau orang mayuh.