Jusufu na Mariamu maaikaraga Nazarethi marĩ na Jesu hamwe na aarĩ na ariũ a nyina. Jusufu aarutaga wĩra wa mbaũ nĩguo ahote kũhingĩria famĩlĩ yake mabataro, na nĩ aamarutaga ũhoro wa Jehova na Watho wake. Nĩ aathiaga hamwe na famĩlĩ yake thunagogi-inĩ kũhoya, na ningĩ nĩ aathiaga Jerusalemu o mwaka nĩ ũndũ wa Pasaka.

Jesu arĩ na mĩaka 12, famĩlĩ yao nĩ yathire Jerusalemu o ta ũrĩa maamenyerete gwĩka. Itũũra rĩu rĩarĩ na andũ aingĩ mũno arĩa maathiĩte gũkũngũĩra Pasaka. Thutha ũcio, Jusufu na Mariamu nĩ maambĩrĩirie kũinũka, na meeciragia atĩ Jesu aarĩ gĩkundi-inĩ kĩa andũ arĩa maarĩ nao. No rĩrĩa maamwethire harĩ andũ a famĩlĩ ciao, matiamuonire.

Nĩ maacokire Jerusalemu na magĩetha Jesu kwa ihinda rĩa thikũ ithatũ matekũmuona. Marigĩrĩrio-inĩ, nĩ maathiire hekarũ-inĩ. Maakorire Jesu kũu aikarĩte gatagatĩ-inĩ ka arutani,  akĩmathikĩrĩria na kinyi na akĩmoragia ciũria. Arutani acio nĩ maakenetio nĩ Jesu mũno nginya makĩambĩrĩria kũmũũria ciũria, na nĩ magegagio nĩ macokio make. Nĩ moonaga atĩ nĩ aataũkagĩrũo nĩ Watho wa Jehova.

Jusufu na Mariamu maarĩ na kĩeha mũno. Mariamu oigire ũũ: ‘Mũrũ wakwa, tũgũcarĩtie kũndũ guothe! Ũrarĩ kũ?’ Nake Jesu akĩmeera: ‘Kaĩ mũtoĩ njagĩrĩirũo gũkorũo ndĩ nyũmba-inĩ ya Baba?’

Jesu nĩ aacokire akĩinũka kwao mũciĩ Nazarethi arĩ hamwe na aciari ake. Jusufu nĩ aarutire Jesu wĩra wa mbaũ. Ũgwĩciria Jesu aarĩ mũndũ wa mũthemba ũrĩkũ arĩ mũnini? O ũrĩa Jesu aakũraga, noguo agĩaga na ũũgĩ na agetĩkĩrĩka nĩ Ngai o na andũ.