Josɛf ɛn Meri wit Jizɔs ɛn dɛn ɔda pikin dɛn bin de liv na Nazarɛt. Josɛf bin de sɔpɔt in famili bay we i bin de wok as kapɛnta, ɛn i bin de tich dɛn bɔt Jiova ɛn in Lɔ. Josɛf ɛn in famili bin de go na di sinagɔg ɔltɛm fɔ wɔship Jiova, ɛn dɛn bin de go na Jerusɛlɛm ɛni ia fɔ di Pasova.

We Jizɔs bin ol 12 ia, in ɛn in famili waka fɔ lɔng tɛm fɔ go na Jerusɛlɛm lɛk aw dɛn kin du ɛni ia. Di siti bin ful-ɔp wit pipul dɛn we bin kam fɔ sɛlibret di Pasova. Afta we di Pasova dɔn, Josɛf ɛn Meri bigin fɔ travul fɔ go bak na dɛn os, ɛn dɛn bin tink se Jizɔs de wit di grup we dɛn ɔl de travul. Bɔt we dɛn luk fɔ am to dɛn fambul dɛn we dɛn ɔl de travul, i nɔ bin de wit dɛn.

Dɛn go bak na Jerusɛlɛm, ɛn fɔ tri dez, dɛn bin de luk fɔ dɛn bɔypikin. Faynali, dɛn go wach fɔ am na di tɛmpul. Na de dɛn si Jizɔs sidɔm midul di ticha dɛn, ɛn i de tek tɛm lisin to dɛn ɛn aks dɛn kwɛstyɔn dɛn. Di ticha dɛn bin so kɔle Jizɔs dat dɛn bigin for aks am kwɛstyɔn dɛn, ɛn dɛn kɔle di kayn we aw i bin de ansa dɛn. Dɛn bin si se Jizɔs rili ɔnda­stand Jiova in Lɔ.

Josɛf ɛn Meri bin rili wɔri. Meri tɔk se: ‘Mi pikin, wi dɔn luk ɔlsay fɔ yu! Usay yu bin de?’ Jizɔs tɔk se: ‘Yu nɔ no se a nid fɔ de na mi Papa in os?’

Jizɔs ɛn in mama ɛn papa bin go bak na dɛn os na Nazarɛt. Josɛf bin tich Jizɔs aw fɔ du kapɛnta wok. We Jizɔs bin yɔŋ, uskayn pɔsin i bin bi? As Jizɔs de gro, i bin gɛt sɛns ɛn dat bin mek Gɔd ɛn mɔtalman lɛk am.