တၢ်မၤလိ ၇၂
ယ့ၣ်ၡူးဒိၣ်ထီၣ်သီ
စီၤယိၤသးဒီးနီၢ်မၤရံအိၣ်ဝဲလၢ ဝ့ၢ်နစၤရ့းအပူၤလီၤ. အဝဲသ့ၣ်အိၣ်ဒီးယ့ၣ်ၡူး ဒီးအဖိမုၣ်ဖိခွါလၢအဂၤတဖၣ်လီၤ. စီၤယိၤသးလုၢ်အီၣ်လုၢ်အီ အဟံၣ်ဖိဃီဖိခီဖျိလၢ အဝဲမၤဝဲပှၤစုသ့ဖိအတၢ်မၤလီၤ. ဒီးစီၤယိၤသးသိၣ်လိအဖိတဖၣ် ဘၣ်ဃးဒီးယဟိဝၤယွၤ ဒီးအတၢ်သိၣ်တၢ်သီလီၤ. ညီနုၢ်စီၤယိၤသး အဟံၣ်ဖိဃီဖိအံၤ လဲၤဝဲလၢဘူၣ်ဘျီၣ်ဒ်သိး ကဘူၣ်ထီၣ်ဘါထီၣ်တၢ်အဂီၢ်လီၤ. တကးဒံးဘၣ် ကိးနံၣ်ဒဲးန့ၣ်အဝဲသ့ၣ်လဲၤဝဲလၢ ဝ့ၢ်ယရူၤၡလ့ၣ်ဒ်သိး ကမၤဝဲဘူၣ်လဲၤကပာ်အဂီၢ်လီၤ.
ဖဲယ့ၣ်ၡူးအသးအိၣ် ၁၂ နံၣ်အခါ စီၤယိၤသးလဲၤကိးဝဲ အဟံၣ်ဖိဃီဖိတဖၣ် ဆူဝ့ၢ်ယရူၤၡလ့ၣ် ဒ်အလဲၤညီနုၢ်ဝဲအသိးလီၤ. ဝ့ၢ်အံၤပှဲၤဝဲဒီးပှၤဂီၢ်မုၢ်တဖၣ်လၢ အဟဲမၤဝဲဘူၣ်လဲၤကပာ်လီၤ. ဖဲအဝဲသ့ၣ် မၤဝဲဘူၣ်အံၤဝံၤအလီၢ်ခံ စီၤယိၤသးဒီးနီၢ်မၤရံ က့ၤကဒါက့ၤဆူအဟံၣ် ဃုာ်ဒီးပှၤအဂၤတဖၣ်လီၤ. ဒီးဖဲအဝဲသ့ၣ်က့ၤလၢကျဲအခါ ဆိကမိၣ်ဝဲလၢ ယ့ၣ်ၡူးပၣ်ဃုာ်လၢပှၤကျါလီၤ. ဘၣ်ဆၣ် ဖဲစီၤယိၤသးဒီးနီၢ်မၤရံ ဃုကွၢ်ဝဲယ့ၣ်ၡူးလၢအဘူးအတံၢ်တဖၣ်အကျါအခါ အဝဲသ့ၣ်တထံၣ်ဝဲယ့ၣ်ၡူးဘၣ်.
စီၤယိၤသးဒီးနီၢ်မၤရံ လဲၤကဒါက့ၤဝဲဆူဝ့ၢ်ယရူၤၡလ့ၣ် ဒီးအဝဲသ့ၣ်ဃုဝဲယ့ၣ်ၡူးလၢ သၢနံၤအတီၢ်ပူၤလီၤ. လၢခံ စီၤယိၤသးဒီးနီၢ်မၤရံ လဲၤဃုဝဲယ့ၣ်ၡူးလၢ တၢ်လုၢ်ဟံၣ်ပူၤလီၤ. ဒီးအဝဲသ့ၣ် ထံၣ်ဝဲယ့ၣ်ၡူးဆ့ၣ်နီၤလၢ ဒၢးဖးဒိၣ်တဖျၢၣ်အပူၤ လၢသရၣ်အါဂၤအကျါလီၤ. ယ့ၣ်ၡူးဒိကနၣ်ဝဲတၢ်လၢ သရၣ်တဖၣ်
တဲဝဲဒီး အဝဲသံကွၢ်ဝဲတၢ်သံကွၢ်လၢ အဂ့ၤတဖၣ်လီၤ. ဖဲသရၣ်တဖၣ် သံကွၢ်ဝဲတၢ်သံကွၢ်တဖၣ်အခါ မ့ၢ်လၢယ့ၣ်ၡူးစံးဆၢက့ၤ အဝဲသ့ၣ်သ့ဂ့ၤဂ့ၤအဃိ အဝဲသ့ၣ်ကမၢကမၣ်ဝဲဒိၣ်မးလီၤ. ဒီးအဝဲသ့ၣ်သ့ၣ်ညါဝဲလၢ ယ့ၣ်ၡူးနၢ်ပၢၢ်ဝဲယဟိဝၤယွၤ အတၢ်သိၣ်တၢ်သီဂ့ၤဂ့ၤလီၤ.စီၤယိၤသးဒီးနီၢ်မၤရံ သူၣ်ကိၢ်သးဂီၤတၢ်လၢ ယ့ၣ်ၡူးအဂီၢ်ဒိၣ်မးလီၤ. နီၢ်မၤရံတဲဝဲလၢ– ‘ဖိဧၢ, ပဃုကွၢ်နၤလၢ တၢ်လီၢ်ဝးဝးလီၤ. ဘၣ်မနုၤအဃိ နမၤဒ်အံၤလဲၣ်.’ ယ့ၣ်ၡူးတဲဆၢက့ၤအီၤလၢ– ‘ယဘၣ်အိၣ်လၢ ယပၢ်အဟံၣ်ပူၤန့ၣ် နတသ့ၣ်ညါဧီၤ.’
ယ့ၣ်ၡူးက့ၤဆူဝ့ၢ်နစၤရ့း ဃုာ်ဒီးအမိၢ်အပၢ်လီၤ. ဒီးစီၤယိၤသးသိၣ်လိန့ၢ်ယ့ၣ်ၡူးလၢ ပှၤစုသ့ဖိအတၢ်မၤလီၤ. ယ့ၣ်ၡူးမ့ၢ်ပှၤသးစၢ်ဒ်လဲၣ်တဂၤလဲၣ်. ဖဲယ့ၣ်ၡူးဒိၣ်ထီၣ်ဝဲအခါ အတၢ်ကူၣ်သ့ဒံးယံာ်ဒံးအါထီၣ်ဝဲ တကးဒံးဘၣ် ပှၤကညီဒီးကစၢ်ယွၤ ဘၣ်သူၣ်ဘၣ်သးအီၤလီၤ.
“ဘၣ်ယသးလၢ ယကမၤ ဖဲဒၣ်နသးလီၤ, ယကစၢ်ဧၢ, ဒီးနတၢ်သိၣ်တၢ်သီန့ၣ် အိၣ်ဝဲလၢယသးကံၢ်ပူၤလီၤ.”—စံးထီၣ်ပတြၢၤ ၄၀:၈