Josefa ni Maria nebapila mwa Nazareta ni Jesu ni bana babona babañwi babashimani ni babasizana. Josefa naapiliseza lubasi lwahae ka kueza musebezi wa bubeti, mi naabalutile ka za Jehova ni Mulao wahae. Kamita nebayanga sina lubasi kwa sinagoge kuyo lapela, mi ka silimo nebayanga kwa Jerusalema kwa mukiti wa Paseka.

Jesu hanaanani lilimo ze 12, lubasi lwahae lwatama musipili omutelele wa kuya kwa Jerusalema sina mone baezezanga kamita. Mwa muleneñi nekutezi batu bane batile kuto eza mukiti wa Paseka. Hamulaho, Josefa ni Maria bakala musipili wa kukutela habo bona inze banahana kuli Jesu naali mwahalaa sikwata sa batu bane bazamaya ni bona. Kono hase bamubatile ku bahabo bona, bapalelwa kumufumana.

Bakutela kwa Jerusalema, mi batanda mazazi amalaalu inze babata mwanaa bona. Hamulaho, bamufumana mwa tempele. Bafumana Jesu inze ainzi mwahalaa baluti, inze ateeleza ka tokomelo ni kubuza lipuzo za butokwa. Baluti nebatabisizwe hahulu ki Jesu kuli mane bakala  kumubuzaka lipuzo. Mi nebakomokisizwe ki likalabo zahae. Balemuha kuli naaziba Mulao wa Jehova.

Josefa ni Maria nebaikalezwi hahulu. Maria ali: ‘Mwanaka, lukubatile hahulu! Neuinzi kai?’ Jesu kiha baalaba kuli: ‘Kana nemusa zibi kuli nilukela kuba mwa ndu ya Ndate?’

Jesu akutela kwa Nazareta ni bashemi bahae. Josefa naalutile Jesu musebezi wa bubeti. Mubona cwañi, Jesu naali mutu yacwañi hanaali mwanana? Hanaanzaa hula, Jesu azwelapili kuba ni butali mi ashemubiwa ki Mulimu ni batu.