Ba Yosefa ne Madia bādi bashikata mu Nazala na Yesu ne na babo bana bakwabo, bana-balume ne bana-bakaji. Yosefa wādi ukwatakanya kisaka kyandi na kwingila bu sendwe wa mbao, kadi wāfundije ba mu kisaka kyandi myanda ya Yehova ne Bijila bya Yehova. Kino kisaka kyādi kyenda kukatōta kyaba ne kyaba ku shinankonka ne kwenda mwaka ne mwaka ku Yelusalema ku masobo a Pashika.

Yesu paābwenye myaka 12, bāendele kisaka kyonso lwendo lulampe lwa ku Yelusalema, monka mobendelanga nyeke. Mu kibundi mwādi muyule bantu bāile ku masobo a Pashika. Kupwa, ba Yosefa ne Madia kēbajokela kwabo, na kulanga’mba Yesu udi nabo mu kibumbo. Ino abo pa kwanza kumukimba mu bantu bobabutulwa nabo, bātunya kumusokola.

Bājokela ku Yelusalema kukakimba wabo mwana, bāmukimbile mu mafuku asatu matuntulu. Mfulo mfulō, bākamukimba ku tempelo. Bātana Yesu ushikete mu bukata bwa bafundiji, wibateja senene ne kwibepangula bipangujo biyampe. Bafundiji bātulumukile bininge pa  mwanda wa Yesu, bāanza kumwipangula bipangujo. Bādi batulumuka muswelo waādi wibalondolola. Bājingulwile amba i mwivwanije Bijila bya Yehova.

Ba Yosefa ne Madia bādi balangalanga bininge. Madia wāmunena’mba: ‘A mwanami, tubakukimbe konsokonso! Le wadi kwepi?’ Yesu wānena’mba: ‘Le kuyukilepo amba mfwaninwe kwikala muno mu njibo ya Tata?’

Yesu wājokela kwabo ku Nazala na bambutwile bandi. Yosefa wāfundije Yesu mwa kwingidila mwingilo wa bu sendwe wa mbao. Molangila, lelo Yesu wādi muntu wa muswelo’ka pa bunkasampe? Yesu paādi wenda utama, tunangu twandi twādi twenda tuvudila’ko, Leza ne bantu bāmutōkelwe mutyima bininge.