Jozefu na Maliya iikalanga umu Nazaleti pamwi na Yesu na ana yao yauze aonsi na akazyana. Pakuti Jozefu asakamala ulupwa lwakwe, waombanga umulimo wa kuwaza nupya wayasambilizyanga pali Yeova na pa Masunde yakwe. Ulupwa luu lwayanga lyonsi ukwi sunagogi, nupya cila mwaka yayanga uku Yelusalemu mu kuzevya Ucilo.

Lino Yesu wali ni myaka 12, ulupwa lwakwe lwakatwike ulendo utali ukuya uku Yelusalemu. Mu musumba mwali antu aingi aile umu kuzevya Ucilo. Pa cisila ca kuzevya, Jozefu na Maliya yatandike ulwendo ulwa kuswilila ukumwao ala yakwelenganya ukuti Yesu atapitila pamwi ni iumba. Nomba lino yezizye ukumulonda muli ya lupwa yao, yatamuzanyile.

Yaswilile uku Yelusalemu, nupya papisile amanda yatatu ala yakumulonda sile. Yasusile iyaya nu kwi tempele. Kuuku, akuno yazanyile Yesu ala atenzi na ya kasambilizya, ale akukutikisya nu kuyuzya mauzyo. Ya kasambililizya yatemilwe sana icakuti  yatandike ukuzya Yesu amauzyo. Nupya yazungwike sana pali vino wasukanga. Yasininkizye ukuti wamanyile sana Amasunde yakwe Yeova.

Jozefu na Maliya yasakamile sana. Maliya watiile: ‘Mwana we, twakulonda sana! Uzye wali kwi?’ Yesu nawe watile: ‘Uzye mutamanya ukuti ndinzile ukuya umu ng’anda yakwe Tata?’

Yesu waile uku Nazaleti pamwi na avyazi yakwe. Jozefu wasambilizye Yesu ivyakuomba umulimo uwa kuwaza. Uzye ukwelenganya ukuti Yesu wali umwana wa musango ci lino wali umwance? Lino wakulanga wakweti amano nupya Leza na antu yamutemilwe.