Josep im Meri rar jokwe ilo Nazeret ippãn Jesus im ajri ro jet nejierro. Josep ear kabwe aikuj ko an baam̦le eo an ilo an kar kaam̦tõ, im ear katakin er kõn Jeova im kien ko an. Aolep iien baam̦le in ear etal ñan im̦õn kabuñ eo im kabuñ ñan Jeova, im kajjojo iiõ rar bar etal ñan Jerusalem bwe ren pãd ilo Kwõjkwõjin Kijoone eo.

Ke ear 12 an Jesus iiõ, e im baam̦le eo an rar etal ilo ial̦ eo aer eaetok ñan Jerusalem ãinwõt aer kõn kõm̦m̦ane aolep iiõ. Jerusalem ear obrak kõn armej ro me rar etal bwe ren pãd ilo iien Kwõjkwõjin Kijoone eo. Ãlikin iien in, Josep im Meri rar jino ro̦o̦l ñan ijo jikier im rar l̦õmn̦ak bwe Jesus epãd ibwiljin kumi in armej ro rej ro̦o̦l ippãerl̦o̦k. Ak ke erro kar pukote ippãn ro nukwier, rar jab loe.

Kõn men in, erro kar bar ro̦o̦l ñan Jerusalem im pukote l̦adik eo nejierro ium̦win jilu raan. Tokãlik, rej kab etal ñan tampel̦ eo. Ke rej reilo̦k, rej loe an Jesus jijet eol̦apãn rũkaki ro, im ej lukkuun roñjake er  im kwal̦o̦k kajjitõk ko rem̦m̦an. Rũkaki rein rar lukkuun bwilõñ kõn Jesus im rar kajjitõk ippãn jet kajjitõk, im rar bar bwilõñ kõn uwaak ko an. Rar kile bwe ear lukkuun mel̦el̦e kõn kien ko an Jeova.

Josep im Meri rar kanooj inepata. Meri ear ba: ‘Nejũ, kõm̦ro l̦akkar pukpukote eok aolep jikin! Kwaar pãd ia?’ Jesus ear uwaak im ba: ‘Kwaar jab jel̦ã ke bwe ij aikuj pãd ilo m̦wiin im̦õn Jema?’

Tokãlik Jesus ear ro̦o̦l ñan Nazeret ippãn jinen im jemãn. Im Josep ear katakini kilen kaam̦tõ. Ilo am̦ baj l̦õmn̦ak, kar kain l̦addik rot Jesus? Eokwe ke ear rũttol̦o̦k, ear l̦apl̦o̦k an mãlõtlõt im ear l̦apl̦o̦k an Anij im ro jet m̦õn̦õn̦õ ippãn.