A Zozɛf ne a Maari ra bee Nazarɛt ne a Zeezi, ne b kom-pugli wã la b kom-dibli a taabã. A Zozɛf ra yaa ra-wãada, n get a zakã rãmb yelle. A ra sõngd-b lame me tɩ b bãngd a Zeova la a tõogã. Yẽ ne a zakã rãmb ra kẽnda zʋɩf-rãmbã karen-doogẽ wã wakat fãa n pʋʋsd a Zeova, la b kẽnd Zerizalɛm yʋʋmd fãa, n maand Pakã kibsa.

A Zeezi sẽn wa n tar yʋʋm 12, yẽ ne b zakã rãmb kẽnga hal Zerizalɛm, wa b sẽn maand yʋʋmd fãa wã. Tẽngã ra pida ne neb sẽn wa n na n maan Pakã. Pakã sẽn sa, a Zozɛf ne a Maari le rɩka yir sore, n tẽed t’a Zeezi bee nebã sʋk tɩ b kuiisẽ. La b wa n gẽes-a lame n pa yã ye.

B leba Zerizalɛm n tɩ gẽes b biigã rasem a tãabo. B wa n tɩ yã-a-la wẽnd-doogẽ wã. A Zeezi ra zĩi karen-saamb dãmbã sʋka, n kelgd-b sõma, la a sokd-b sogsgo. Karen-saamb dãmbã sẽn yã t’a Zeezi tara yam wʋsgã, ling-b lame tɩ b sɩng n  sokd-a sogsgo. A sẽn da leokd to-to wã ling-b lame n paase. B ra neeme t’a wʋmda a Zeova tõogã võor sõma.

A Zozɛf ne a Maari sẽn da nan pa yã-a wã, ra namsd-b-la wʋsgo. A Maari yeela a Zeezi yaa: ‘Tõnd gẽesa foo zĩig fãa. Foo ra bee yɛ?’ La a Zeezi yeel-b lame: ‘Yãmb pa mi tɩ mam tog n zĩnda m Ba wã roogẽ la?’

A Zeezi tũu a baaba ne a ma, tɩ b leb Nazarɛte. A Zozɛf wilga a Zeezi ra-wãad sẽn tʋmd to-to. Fo tagsdame t’a Zeezi sẽn wa n yaa biiga, a ra tara manesem bʋgo? A ra bɩtame, t’a yamã paasdẽ, tɩ Wẽnnaam ne nebã nong-a.