Yosefe na Maliya va yoyele mu Nazaleta na Yesu na vana vavo vakuavo. Yosefe ua niungile vusoko vueni mu ku linga vukalupindelu, kaha ua va longesele via Yehova na Masiko eni. Vusoko vuose vua kele na kuya ku sinangonga ntsimbu yose mu ku lemesa na kuya ku Yelusalema ku cilika ca Pasovala muaka ku muaka.

Omo Yesu ua kele na miaka 12, vusoko vueni vuendele vungendzi vua kama vua kuya ku Yelusalema, ngue mu va kele na ku linga ku sua kumo. Mbonge ya sulile na vantu vezile mu ku hitisa cilika ca Pasovala. Mu ca huile cilika, Yosefe na Maliya va kutile vungendzi vua ku hiluka kuimbo, kaha va singaniekele ngecize Yesu neni ua kele ha civunga ca vakuavo. Vunoni omo va mu tondele ha kati ka vavusoko vuavo, ka va mu uanene.

Ngeci va hilukile ku Yelusalema, kaha va ka mu tondele matangua atatu. Mu nima yaco va ile ku tembele. Kaha va muene Yesu na tumama ha kati ka valongisi, ali na ku va halakana oku a va  linga vihula via seho. Valongisi va komokele cikuma Yesu, ngeci navo va putukile ku mu linga vihula. Va komokele naua vikumbululo vieni. Va muene ngecize Yesu uevuisisile Masiko a Yehova.

Yosefe na Maliya va lisosomuene cikuma. Ngeci Maliya ua handekele ngueni: ‘Munange, tu na kala na ku ku tonda kuose! Kulihi u na kala?’ Kaha Yesu ua va kumbuluile ngueni: ‘Ka mua tantekeyele ngecize nja pande ku kala kuno ku ndzivo ya Tata ni?’

Yesu ua ile kuimbo liavo ku Nazaleta na visemi. Yosefe ua longesele Yesu vukalupindelu. Mu ku mona cove, Yesu ua puile muntu ua cifua cika mua puile kanike? Yesu ua kolele na mana na kuya Njambi na vantu ku mutima.