Josefa na Maria vaigara muNazareta na Jesu pomwe no vana vamweni vo vorume no vokaji. Josefa waisapota mbhuri yake ngo kushanda inga muvezi zve iyena waivajijisa ngo pamusoro po mutemo wa Jehovha. Mbhuri yake yaigara yecienda ku sinagoga konamata zve yaiendazve ku Jerusarema ku phasika gore ngo gore.

Jesu paainga no 12 o makore, mbhuri yake yakaita hwendo wakareba kuenda ku Jerusarema inga cirovejeso. Dhorobha rainga rakazara maningi ngo vandhu vainga vaviya ku Phasika. Poyakapera Phasika, Josefa na Maria vakatanga kuita hwendo kuti vahwirire kanyi, vecirangarira kuti Jesu wainga pakati po vandhu vovaifamba navo. Asi pavakazomupsaka pakati po hama jake, avazivi kumuwana.

Ivona vakahwirira Jerusarema zve vakaita mazuva matatu vacimupsaka. Pejisire, vakaenda ku temberi. Vakawana Jesu wakagara pakati po vajijisi, ecinasa kupurukira no kuita mubvunjo jaushoni. Vajijisi vakashamaisika maningi ndi jesu, zvokuti vakatanga  kumuita mubvunjo. Ivona vaikahamara ngo mupinguro jake. Vaikwanisa kuvona kuti Jesu waizwisisa mutemo wa Jehovha.

Josefa na Maria vainga vacineseka maningi. Maria wakati: ‘Mwanangu, wainga uri kwapi? Baba wako na inini tatambujika ngo kukupsanga!’ Jesu wakati: ‘Amucaizviziva kuti ndinofanera kuva mu nyumba ya Babangu?’

Jesu wakahwirira ku Nazareta no vabari vake. Josefa wakajijisa Jesu basa ro kuveza. Unorangarira kuti Jesu wainga mundhu wo mushovonyi paainga mudoko? Painga ecikura mu uzivi, Jesu waiwana unyasha pamberi pa Mwari no po vandhu.