Josefa le Maria ba be ba dula Natsaretha le Jesu le barwa ba bona ba bangwe le barwedi. Josefa o be a hlokomela lapa la gagwe ka go rekiša dilo tšeo a bego a di betla. Le gona o be a ruta lapa la gagwe ka Jehofa le Molao wa gagwe. Josefa o be a eya le lapa la gagwe sinagogeng ka mehla go yo rapela Jehofa. E bile ngwaga o mongwe le o mongwe, ba be ba eya Jerusalema go yo keteka monyanya wa Paseka.

Ge Jesu a be a na le mengwaga e 12, lapa la gabo le ile la sepela leeto le letelele la go ya Jerusalema, ka ge le be le eya moo ngwaga o mongwe le o mongwe. Ge ba fihla moo, ba ile ba hwetša go tletše batho bao ba tlilego monyanyeng wa Paseka. Ge monyanya o fedile, Josefa le Maria ba ile ba thoma leeto la go boela gae. Ka nako yeo, ba be ba nagana gore Jesu o gare ga batho bao ba sepelago le bona. Eupša ge ba thoma go mo nyaka melokong ya gabo bona, ba ile ba se mo hwetše.

Ba ile ba boela Jerusalema, gomme ba fetša matšatši a mararo ba mo nyaka. Mafelelong, ba ya tempeleng. Ba ile ba hwetša Jesu moo, a dutše gare ga barutiši, a ba theeditše ka kelohloko e bile a ba botšiša dipotšišo. Barutiši bao ba ile ba kgahlwa kudu ke Jesu, moo ba ilego ba thoma go  mmotšiša dipotšišo. Le gona ba be ba makatšwa ke dikarabo tša gagwe. Ba be ba bona gore o kwešiša Molao wa Jehofa.

Josefa le Maria ba be ba tshwenyegile ka Jesu. Ge ba mo hweditše, Maria o ile a re: ‘Ngwanaka, re be re go nyaka gohle! O be o le kae?’ Jesu a re: ‘Na le be le sa tsebe gore ke swanetše go ba mo ntlong ya Tate?’

Jesu a boela gae le batswadi ba gagwe kua Natsaretha. Josefa o ile a ruta Jesu mošomo wa go betla. O nagana gore Jesu e be e le motho wa mohuta mang ge e be e sa le lesogana? Ge Jesu a dutše a gola, o ile a ba bohlale kudu gomme a tšwela pele a kgahla Modimo le batho.